Guovdageainnu Dáloniid listu lea ožžon 21,1 proseantta jienain ovdagihtii válggas, mii lea 8,7 proseantta lassáneapmi 2011 válgga ektui. Liikká ii astta njunuš illudit.
Guovdageainnu Dáloniid listu lea ožžon 21,1 proseantta jienain ovdagihtii válggas, mii lea 8,7 proseantta lassáneapmi 2011 válgga ektui. Liikká ii astta njunuš illudit.
Guovdageainnu Bargiidbellodat illuda go leat nu olu ovdánan, muhto Guovdageainnu Dáloniid listtus lea maid issoras buorre ovdáneapmi leamaš go geahččá 2011 ovdagihtii jienasteami ektui. Sii leat ovdánan 12,4 proseanttas ja gitta 21,1 prosentii. Dat mielddisbuktá 8,7 proseantta ovdáneami, ja sii lea Guovdageainnu goalmmádin stuorimus bellodat.
Barggus
Isak Mathis O. Hætta lea ieš barggus iežas kafeas. Son lea suvrrosteame borramuša gussiide Kautokeino Villmarkssenteris, mii lea su boradan- ja idjadanfitnodat. Hætta lea ilus go ovdánit 2011 ektui, muhto ii astta illudit.
– Guossit dárbbašit borramuša, nu ahte mun in astta válgagohcimis leat, muitala son.
Ovdánan earáid geažil
Hætta jáhkká sin ovdáneami boahtit earáid geažil liikká olu go sin iežaset geažil.
– Mun jáhkán midjiide lea buktán dán mađe ovdáneami go earát leat spierggadan juohke guvlui, ja mii leat seammás leamašan hui čielgasat iežamet áigumušáiguin ja politihkain, lohká son.
Movt leat jurddašan ovttasbarggu dál go Sámeálbmot listu orru garrasit niedjame?
– Mii gal sáhttit ovttasbargat vaikke geainna, muhto diehttelasat Johttisápmelaččaide dieđusge šattašii váttis minguin ovttasbargat. Dan jáhkán sidjiide váttisin, go de šattaše min meahcástanpolitihka čuovvut, lohká son vel.
