Duopmu bisuhuvvo áššis mas muhtin dievdu lea dubmehallan go lea vaššicealkámušaid čállán sámiid vuostá neahtas. Son ii leat áigon váidit ášši Alimusriektái, ja nu lea historjjálaš duopmu bissovaš.
Dievddu bealušteaddji, advokáhtta Tor Haug, lohká Saltenpostenii distaga ahte jáhkkimis livččii šaddan váttisin oažžut ášši Alimusriektái, ja leat dan dihte válljen ášši diktit.
– Olles álbmotčeardda vuostá
50-jahkásaš dievdu lea dubmehallan go lea cuiggodan ja čállán vaššicealkámušaid sápmelaččaid vuostá Avisa Nordland Facebook-siiddus diibmá geasset.
Dikkis lea áktor Gaute Bendos Rydmark cealkán ahte ii leat sullasaš ášši leamaš Norggas ovdal, dan sivas go ášši ii leat dušše ovtta olbmo vuostá, muhto olles álbmotčeardda vuostá, dieđiha Avisa Nordland.
Hålogalándda lágamánnerievttis dubmehalai dievdu čohkkát 18 beaivvi ja máksit 15 000 ruvdnosaš stuoru sáhku.
Dat lea seamma duopmu go Sálttu diggegottis guovvamánus.
Čuoččuhii leaikkastallan
Čálus man dievdu lei čállán lei ná (sámegillii jorgaluvvon):
«Gula sii gullet duoddariidda. Eai ge dás daiguin ártegis kloavdnabiktasiiguin maiguin kárvejit. Jus havssát cahkkehangolgosa, de lea sápmelaš das lahkosis gii lea 1,30 allat ja geas hakso suovvahádja».
Son mieđihii dikkis ahte lei čállán dan čállosa, muhto čuoččuhii ahte lei oaivvilduvvon leat suohtasin.
(©NTB)
