Dutkamat čájehit ahte golmmajahkásaš mánát eai leat jeagoheamet go vajáldahttet uvssa gokčat, vaikke leat ožžon čielga dieđu gokčat dan. Sii njulgestaga eai veaje dasa maidege, muitala dutki.
Ii leat álo álki muitit buot bargguid ja muhtumin sáhttá vajálduhttit bátnedoaktára diimmu. Ovdalskuvlaagi mánáide lea vel váddásat muitit, go sin muitu lea ain ovdáneamen. Kanada Brock University dutki Mahy lea dutkan mo muitu ovdána áiggi mielde. Son čállá iežas kronihkas ahte dutkamis mánát vajálduhtte barggu man galge čađahit, eaige ádden ahte sii ledje boastut bargan, čállá Forsking.no Go geardduhedje barggu, de mánát čađahedje dan vaikke ledje ovddalgihtii vajáldahttán dan.
Dutkan čájeha ahte mánát eai nákce muitit dan mii galgá geavvat, go vuordámušmuittut eai leat ovdánan smávva mánáin. Dutki oaivvilda ahte leat iešguđet sivat manin mánát vajáldahttet boahtteáiggi plána. Dan botta go guovtte- ja golmmajahkásaš mánát vajáldahttet oalát barggu, de sáhttet badjel golmmajahkásaš mánát muitit barggu, muhto eai nákce čađahit dan rivttes áigái.
Videnskab.dk artihkkala bokte muitaluvvo ahte mánáin ii leat dábálaš muitufunkšuvdna ovdal go leat birrasii čiežajahkásaččat.
Dutki ávžžuha ahte váhnemat eai vuorjja mánáid, go dat dagaha ahte mánát muitet vel heajubut.
