Ihttin rahppo Guovdageainnus nuoraidviessu maid nuoraidkoordináhtor fárrolaga nuoraiguin lea ásahan ja ordnen.
Ihttin rahppo Guovdageainnus nuoraidviessu maid nuoraidkoordináhtor fárrolaga nuoraiguin lea ásahan ja ordnen.
Ihttin rahppo Guovdageainnu márkanis nuoraidviessu, nuoraide geat leat gávccát luohkás gitta 19 jahkásaččaide.
Vejolašvuohta nuoraide
Guovdageainnu suohkana nuoraidkoordináhtor, Ellen Sire Triumf, lea ovttas nuoraiguin bargan ásahit dán viesu, ja ihttin lea gearggus rahpat viesu.
– Nuorat leat viššalit buktán sávaldagaid ja evttohusaid maid ja movt sii áiggošit viessu galggašii leat. Lean hui ilus go nuorain lea beroštupmi, ja veahkehit, muđui livčče munnje váttis diehtit maid sii áigot, čilge son.
– Dasa lassin leat olbmot addán ja vuovdán diŋggaid hálbái maid mii dáppe sáhttit geavahit. Mis lea dáppe earret eará gievkkan, sofá, tv, tv-speallu ja biljárdabeavdi. Dá ledje sávaldagat maid nuorat bukte.
Rabas guovtte geardde vahkkui
Ihttá rájes lea viessu rabas guovtte geardde vahkus.
– Go dál lean vuos okto rávisolmmoš, de in sáhte doallat eará go guktii vahkkui rabas. Sávvamis oažžut eambbo olbmuid mielde, nu ahte boahtteáiggis soaitit sáhttit doallat eanet beivviid rabas, lohká Triumf.
Sávvá nuorat bohtet
Elle Sire Triumf sávvá ahte nuorat geavahit dán fálaldaga, ja ahte bohtet rahpamii ihttin duorastaga diibmu 18.00.
– Lea nu olu vejolašvuođat maid nuorat sáhtašedje fuobmát bargat dáppe, ja jus juoga váilo, de lea hui sihkkarit vejolaš ordnestit dan maid. Livčče hui somá jus nuorat boađášedje ja livčče beroštupmi geavahit dán fálaldaga, loahpaha Guovdageainnu suohkana nuoraidkoordináhtor Ellen Sire Triumf.
