Nuoreh! jotket iežaset bivnnuhis prošeavtta, gáktebeaivvi, ja hástalit olbmuid čuovvulit ja čalmmustahttit ahte mii leat ain dás.
Bearjadaga, cuoŋománu 9. beaivvi, lea riikkaviidosaš gáktebeaivi maid nuoraidsearvi, Nuoreh!, lágida. Riikaviidosaš gáktebeaivi lágiduvvui vuosttaš geardde 2014:s ja ihttin lea fas áigi ávvudit!
Nuoreh! bovde du searvat sin jahkásaš gáktebeaivvi ávvudeapmái. Ruovttusiiddus čállet ahte Cuoŋománu 9. b. ávžžuhit sii buot sápmelaččaid nahkehit gávtti, dahje eará sámi gárvvuid, čájehan dihte ahte mii leat ain dás ja leat čeavlát!
Gápptebiejvve lea buohkaide, beroškeahttá agis ja báikkis. Jus ii leat gákti, de sáhtát coggalit juogo luhka, vuoddagiid, liinni, gápmagiid jna.
Nuoreh! avžžuha buohkaid govvet iežaset, bidjat gova sosiála fierpmádagaide ja gilkorastet ná; #gáktebeaivi2021 #gápptebiejvve2021 #gaptabiejjie2021.
