Ealgabivdovuorbádeapmi lea giđa stuorámus dáhpáhus olu ealgabivdiide. Cuoŋománu 1. beaivvi rájes de sáhttá ohcat beassat ealgabivdui boahtte čavčča.
Ealgabivdovuorbádeapmi lea giđa stuorámus dáhpáhus olu ealgabivdiide. Cuoŋománu 1. beaivvi rájes de sáhttá ohcat beassat ealgabivdui boahtte čavčča.
Dán jagi dattege lea ođas dat go buohkat geat áigot ohcat ealgabivdui beassat, fertejit ohcat www.inatur.no siiddus. Diibmu 09.00 rájes cuoŋománu 1. beaivvi, de lea vejolaš ohcat ealgabivdui, čállá FeFo preassadieđáhusastis.
– Go dát leat vuosttaš jahki go čađahat ohcamiid ja vuorbádeami inatur.no siiddus, de dáhttut geavaheddjiid muitalit midjiide mo dát orro doaibmamin, sihke rámi ja moaitagiid. Dákkár responsa geavaheddjiiguin sáhttá leat mielde buktit vel buoret čovdosa boahtte hávvái, dadjá Anders Aarthun Ims, guhte lea meahcihálddašeaddji FeFos.
Dáid sáhttá sáddet elg@fefo.no čujuhussii.
Ávžžuha bivdiid veahkkálaga ohcat
Buot ohcamušaid galgá dán jagi sáddet neahta badjel, ja listu ohcamušain ođasmahtto dađistaga FeFo ruovttusiidduin.
– Go rievdá bábirkeahtes ohcamušaide de dat sáhttá leat hástaleaddji muhtin bivdojoavkojođiheddjiide, ja mii ávžžuhat danin ahte dat bivdojoavkoláhttut geat leat eanet hárjánan dihtoriidda, buori áiggis veahkehivčče daid jođiheddjiid geat eai leat nu hárjánan dása, joatká Ims.
Inatur maid sáhttá veahkehit post@inatur.no čujuhusa bokte, dahje telefuvnna bokte 74 27 30 90 nummira bokte.
Dán jagi lea ealgabivdoohcanáigemearri cuoŋománu 21. rádjai. Nu mo ovddit jagiid, de leat dušše báikkálaš joavkkut mat sáhttet ohcat nu gohčoduvvon «násteguovlluide».
– Mii sávvat bivdiid hárjánit ođđa ohcanvuohkái, ja sávvat buot fylkka ealgabivdiide lihkku vuorbádeamis ja sávvamis maid buori bivddu, loahpaha Anders Aarthun Ims.
