-Almmuhus-
-Almmuhus-
OĐĐASATIevttá surgadis lihkohis­vuohta: – Boktá olu muittuid 

Ievttá surgadis lihkohis­vuohta: – Boktá olu muittuid 

-

-

Ikte gahčai Amerihká suodjalushelikopter oalle lahka dan báikki gos Olof Anders Kuhmunen gahčai helikopteriin 2003:s. Ievttá surgadis dáhpáhus boktá fas muittuid Nordlándda boazodoallái.

Bearjadaga eahkedis vurde Bådådjos Amerihká suodjalushelikoptera seaivut ovdalaš diibmu 18, muhto go ii ollen dan áigái, de dieđihedje helikoptera láhppon ja ohcanakšuvdna biddjui johtui.

Lávvordaga duođaštit Nordlándda politiijat ahte dat njealjis geat ledje helikopteris, leat duššan.

Loga maid:
Helikopter gahčai Báidáris: Duođaštit njealjása duššan 

Guovllu boazobargi

Olof Anders Kuhmunen (72) lea Sáltoduoddara boazodoalli, gos sin orohat lea, ja lea hárjánan vánddardit helikopteriin boazobarggus. 2003 čavčča lei dáhpáhus go gahčai helikoptergirdiin boazobargguid vuolde.

Ievttá lihkohisvuohta Báidáris boktá fas muittuid dan dáhpáhusas mii dalle 2003:s geavai.

– Lean hui oahpis dan guvlui ja lean ollu leamaš doppe gos girdi dál gahčai, muitala Olof Anders Kuhmunen Ávvirii lávvordatiđit.

Sullii 2 miilla eret ievttá lihkohisvuođabáikkis gahčai helikopteriin go lei doaimmaheame boazobargguid dan čavčča. Helikopteris lei son ja helikoptervuoddji, ja beasaiga dearvan lihkohisvuođas, muhto dáhpáhus lea darvánan Olof Andersa muitui.

– Muittut bohtet

Bearjadaga bekkii ahte Amerihká suodjalusgirdi lei gahččan Gråtådalenii, mii lea Sáltoduoddaris.

– Jurddahan ahte lea oba ilgat gullat ja muittut bohtet fas go gullen dan dáhpáhusa birra. Mun gahčen diekko báikkiid dalle, muitala Olof Anders Kuhmunen.

Son čilge leat várálažžan vánddardit doppe ja sáhttá hejot mannat. Dál lea dálki maid oalle heittot sin guovllus.

– Lea fasttes báiki ja leat alla gáissát doppe. Dat lea hui muohttái ja leat olu riđut maid báikkis gos helikopter gahčai. Dál gal lea nu dálki ja Sáltoduoddara luodda lea vel gitta, čilge Olof Anders Kuhmunen.

Olof Anders orru Lønsdalenis, mii lea moadde miilla eret Gråtådalenis. Dán dálvvi lea eanaš oassi sin bohccuin Lønsdalenis gos sáhttet biebmat ealu dan sivas go heajos guohtundilli lea. 

(Ášši joatká gova vuolábealde)

VÁRÁLAŠ VÁNDDARDIT: Olof Anders Kuhmunen lohká leat várálažžan vánddardit Gråtådalenis gos lea muohttái ja riđut firret. Priváhtagovva.
VÁRÁLAŠ VÁNDDARDIT: Olof Anders Kuhmunen lohká leat várálažžan vánddardit Gråtådalenis gos lea muohttái ja riđut firret. Priváhtagovva.

– Lei lihkku dalle

Sus leat máŋggas lagas bearrašis duššan go girdi lea gahččan boazobargguid vuolde. 1996:s massii vieljas Lars Johannes Kuhmunena Sandhornsullos. 2018:s duššai su vielja bárdni Lars Nikolas Angler Kuhmunen go mikrogirdi gahčai Meløyas.

Jagi 2003 lihkohisvuohta manai bures, ii ge loga dovdot dego livčče nu máŋga jagi golihan dan rájes.

– Ii oro nu áigá go dat geavai. Geahččalan bidjat eret dan jurdaga vai in jurddat juohke beaivvi dan dáhpáhusa birra, muhto boahtá veahá jurdda ahte lei lihkku go bessen bures dan dáhpáhusas ii ge mannan hejot, lohká Olof Anders Kuhmunen.

-Almmuhus-