Sámi girkobeaivvit lágiduvvojit Anáris boahtte vahku. Girkobeivviid oktavuođas Anáris sáhtát čuovvot golbma iešguđetlágan seminára earret eará iešsorbmema birra Sámis.
Sámi psykologa ja dutki, Jon Petter Stoor, logaldalla semináras fáttás «Mo eastadit iešsorbmema Sámis», Sámi girkobeivviin. Soai leaba Heidi Eriksen´ain, gielddadoaktariin Ohcejoga dearvvasvuođaguovddážis, jođihan prošeaktajoavkku, mii ráhkadii davviriikkalaš sámiid iešsoardimiid eastadanplána.
Nuppi seminára beaivvi, Sámi girkobeivviin, lea fáddán «Sámeeatnama luondduguovlluid kristtalašvuohta». Das ságastallet sámiid árgabeaikristtalašvuođa birra ja dan mearkkašumi. Láidesteaddjin lea Tore Johnsen, gii bargá amanueansan Girkolaš skuvlenguovddážis, Romssas.
– Johnsen lea iežas doavttirgráda dutkamuššii jearahallan olbmuid Finnmárkkus. Jearahallamiin son čielggadii earret eará makkár lea árgabeaivvi kristtalašvuohta sámiid ealliimis, makkár árbevierut ja makkár muitalusat dasá gullet, muitala Sámi girkobeivviid plánenjoavkku čálli, Erva Niittyvuopio Yle Sápmái
«Sivdnideamis Sivdnideapmái»
Lovisa Mienna Sjöberg logaldalla nuppi beaivvi semináras fáddas «Sivdnideamis Sivdnideapmái». Fádda lea makkár lea olbmo sadji sivdnádusas ja mo olmmoš ieš oaidná ja ádde sajistis sivdnádusas.
Sámi girkobeivviid lágideapmái vurdet sullii 350–500 oassálasti. Olles prográmma gávnnat dáppe.
