-Almmuhus-
OĐĐASAT– Iešguđet gielladilit dárbbašit iešguđet ortnegiid

– Iešguđet gielladilit dárbbašit iešguđet ortnegiid

-

-

Sámediggeráđđi ovddida ášši giellaguovllu ja suohkankategoriijaid birra dievasčoahkkimii juovlamánus. – Iešguđet guovlluid gielladilli dat galgá leat vuođđun boahtteáiggi giellaplánemii, dadjá sámediggepresideanta Aili Keskitalo Sámedikki preassadieđáhusas.

Sámediggeráđđi deattuha garrasit NAČ 2016:18 Váibmogiela čuovvuleami. Sámedikkis lea mihttomearri nannet ja ovddidit sámegiela miehtá riikka. 

Dálá ortnega bokte lea buot suohkaniin seamma geatnegasvuođat vaikke vel sihke gielladilli ja sámegielagiid lohku suohkanis suohkanii molsašuddá hui ollu.

– Okta min stuorámus hástalusain dál lea ahte dálá sámegiela hálddašanguovlu ii váldde vuhtii dan ahte gielladilli rievdá suohkanis suohkanii, dadjá Keskitalo preassadieđáhusas.

 

– Njuolggadusat fertejit dávistit duohtavuhtii

NAČ2016:18 Váibmogiella evttoha earuhuvvon ortnega mas leat iešguđet kategoriijat daid suohkaniid várás mat gullet sámi giellaguvlui, namalassii giellaseailluhansuohkanat, giellaealáskahttinsuohkanat ja stuorragávpotsuohkanat.

Sámediggeráđis leat vuordámušat dasa ahte dakkár giellaguovlu, mas leat iešguđet suohkankategoriijat, buorebut váldet vuhtii suohkaniid dárbbuid ja hástalusaid.

– Mii diehtit ahte suohkaniid gielladiliin leat stuorra erohusat. Muhtun suohkaniin lea sámegiella ealli giellan buot surggiin suohkanis, ja eará suohkaniin lea dilli earálágan, ja dáin suohkaniin lea dárbu loktet gelbbolašvuođa sámegielas. Danne lea hui deaŧalaš ahte ráhkaduvvojit dakkár njuolggadusat mat buorebut dávistit duohtavuhtii, dadjá Keskitalo.

 

Evttoha guokte suohkankategoriija vel


– Okta min stuorámus hástalusain dál lea ahte dálá sámegiela hálddašanguovlu ii váldde vuhtii dan ahte gielladilli rievdá suohkanis suohkanii, dadjá Keskitalo preassadieđáhusas.
 Govven: Kenneth Hætta (Sámedikki preassagovva)

Sámediggeráđđi evttoha ahte giellaresursasuohkanat šaddá ođđa kategoriijan lassin dan golmma kategoriijii maid giellalávdegoddi lea evttohan raporttastis.

– Mis leat dál guokte suohkana gos sámegiella lea eanetlohkogiellan. Dat lea áibbas áidnalunddot sámi giellaoktavuođas, ja mii oaivvildit ahte livččii deaŧalaš sihkkarastit ahte maiddái boahtteáiggis leat suohkanat gos sámegiella lea eanetlohkogiellan. Mii oaivvildit ahte dát suohkanat leat resursasuohkanat, ja mii háliidit ahte dát suohkanat galget sáhttit fuolahit muhtun doaimmaid mat bohtet olles servodahkii buorrin, dadjá Keskitalo.

 

Geatnegasvuođat sámi giellageaveheddjiid ektui

Sámediggeráđđi oaivvilda ahte lea deaŧalaš oažžut oidnosii ahte maiddái eará suohkaniin leat vissis geatnegasvuođat sámi giellageavaheddjiid ektui, ja evttoha danne ahte maiddái eará suohkaniid sierra kategoriijan.

Viidáseappot lea Sámediggeráđđi oaidnán ulbmillažžan oažžut mielde giellaguvlui maiddái smávit gávpogiid, ja evttoha danne ahte dat kategoriija gohčoduvvo gávpotsuohkanin ii ge stuorragávpotsuohkanin, nu mo giellalávdegoddi evttoha.

– Sámi giellaguovlu ii guoskka dušše olles sámi álbmogii, muhto das lea maid stuorra mearkkašupmi Váibmogiela ollu eará doaibmabidjoevttohusaid čuovvuleapmái. Danne lea mu mielas deaŧalaš ahte mii dál digaštallat dan dievasčoahkkimis, loahpaha sámediggepresideanta Aili Keskitalo Sámedikki preassadieđáhusas.

-Almmuhus-