Fanashoavda Bjørne Kvernmo hástala searvat gilvui ja oalgguha idjadit su fatnasis.
Vuoittu sáhtát fasket jus liikot Sealers / Ishavsblod Facebook siiddu.
Vaikko idjadeapmi dáhpáhuvvá Romssas gáddeguoras, de lea vejolaš beassat ijastallat dan fatnasis mii johttá viidát mearaid alde.
Bjørne Kvernmo fanas, «MS Havsel», galgá leat dat maŋemus njuorjobivdifanas mii lea doaimmain.
Sugada, gárži ja lávttas
– Soaittát duođaid beahtahallat. Bárut sugadahttet fatnasa, veahkkemutuvra jurrá, olbmot geat ihkku bohtet fatnasii ja dievva skávllit olggobealde. Gáržžes gájot, lávttas gávnnit, oktasaš hivsset mii álo lea anus, leat oasit maiguin fanashoavda Kvernmo oalgguha.
– Albma bivdoborramuš iđđes, njuorjobiergu ja buvru, muitala Bjørne, gii ávžžuha olbmuid doapmat liikot su siiddu ovdal diibmu gávcci duorastateahkeda. Idjadeapmi lea ođđajagimánu 20.beaivvis 21.beaivái, bearjadagas–lávvordahkii.
MS Havsel fanas lea Romssas dáid beivviid go Romssa filbmafestivála lágiduvvo.
Okta filmmain mii čájehuvvo lea «Sealers / Ishavsblod». Filmmas čuovvut fatnasa go leat njuorjobivddus.
– Vuoittu sáhtát skeŋket maid olbmái mii ii soaitte leat nu buorre olmmái, leaikkastallá Kvernmo.
