Guovdageainnu Thon Hotealla lea válljejuvvon mielde finálii iđitborramušgilvvus mas vuoiti almmuhuvvo čakčat.
Guovdageainnu Thon Hotealla lea válljejuvvon mielde finálii iđitborramušgilvvus mas vuoiti almmuhuvvo čakčat.
Guovdageainnu Thon Hotealla bargit ávvudit dál go leat válljejuvvon viidáset «Twinings Best Breakfast 2016» gilvvus mas nammadit buoremus iđitborramuša Norgga hoteallaid gaskkas.
Gilvui leat válljen hoteallaid máŋgga oasis. Ovtta oasis beasai Guovdageainnu Thon Hotealla mielde viidáset árvvoštallamii, ja dál lea olahan gitta finálii.
Finálas leat 11 finalistta mielde šaddat Norgga buoremus iđitborramušhoteallan.
Vuosttaš geahččaleamis nagodedje
Čakčat galledišgohtet finalistahoteallaid ja isket makkár hoteallas lea buoremus iđitborramuš. Finálajurys leat Wenche Andersen, Lars Erik Underhun ja goalmmát jurylahttu gean eai áiggo almmuhit.
Sii galget čavčča mielde mátkkoštit hoteallaide, ja golggotmánu álggus čielgá makkár hotealla lea vuoitán gilvvu.
– Lea jáhkkemeahttun hávski midjiide, muitala Guovdageainnu Thon Hotealla direktevra Knut Vidar Alseth Ávvirii.
– Mii bijaimet mihtu olahit finálii beassat diibmá čakčat, ja lea nu issoras suohtas go leat nagodan vuosttaš geahččaleamis. Dál livččii somá vuoitit, muitala Alseth hui ilolaččat.
Unna Guovdageainnuš
Dákkár gilvu bidjá Guovdageainnu hotealla oidnosii ja olbmot fuomášit báikki.
– Lea somá go unna báikkáš Guovdageaidnu lea mielde dákkár stuora gilvvus buoremusaid fárus. Mii bargat hui ollu biepmu ráhkadit, ja lea buorre dovdu oažžut rámi dan barggu ovddas maid mii bargat, muitala hotealladirektevra.
«Twinings Best Breakfast» čállá neahttasiiddus ahte lea vuosttaš geardde go vásihit buriid hoteallaborramušaid mat eai beasa mielde finálii.
Lea váttis beassat nállošalmmi čađa, ja dat hoteallat mat leat beassan viidásit ráhkadit iđitborramuša internašunála bajimus dásis.
Dá leat hoteallat mat gilvalit finálas:
Thon Hotel Guovdageaidnu
Scandic Ishavshotel (Romsa)
Thon Hotel Lofoten (Svolvær)
Scandic Havet (Bådåddjo)
Scandic Hell (Stjørdal)
Scandic Nidelven (Troandin)
Scandic Byparken (Bergen)
Thon Hotel Rosenkrantz (Bergen)
Nythun Høyfjellstue (Fagernes)
Thon Hotel Rosenkrantz (Oslo)
The Thief (Oslo)
Haugen-joavku lágida iđitborramušgilvvu 12.geardde. Norgga buoremus iđitborramuš nammaduvvo golggotmánus.
