Ohcejoga gieldda «Deanuleagi sámástit» guovttejahkásaš (2020–2022) Interreg Nord -prošeavtta olis skeŋke gielda sutnje gii hutká vuogas nama gieldda sámi giellaguovddážii 100 euro skeaŋkakoartta Sámi Duodjái.
Gilvoáigi lea 14.12.2020–10.1.2021. Gilvvu vuoiti bálkkašuvvo 100 euro skeaŋkakoarttain Sámi Duodjái. Vuoiti válljejit Deanuleagis sámástit -projeavtta bargit valljejit vuoiti, dieđiha Ohcejoga gielda ruovttusiiddus.
– Hutkka Ohcejoga ođđa giellaguovddážii nama ja vuoitte 100 euro skeaŋkakoartta! ávžžuha Ohcejoga dieđiheaddji-buvttadeaddji Aletta Lakkala.
Sádde nammaevttohusaidat ja oktavuođadieđuidat maŋimustá ođđajagemánu 10. beaivve.
Ohcejoga giellaguovddáža várás
Dieđiheaddji-buvttadeaddji čilge Deanuleagis sámástit -projeakta lágida nammagilvvu Ohcejoga ođđa giellaguovddáža váras. «Deanuleagis sámástit» lea guovttejahkásaš (2020–2022) Interreg Nord -projeakta, man oktan váldoulbmilin lea vuođđudit Ohcejohkii iežas sámi giellaguovddáža. Giellaguovddášdoaimmas lea guhkes historjá Norgga beale Sámis, muhto Suoma bealde sámi giellaguovddážat eai vuos gávdno. Giellaguovddáš vuođđuduvvo Ohcejoga gili Áilegas-guovddážii.
Deanuleagis sámástit -projeakta sávvá gilvui erenoamážit nammaevttohusaid, mat man nu láhkai čalmmustahttet Deanuleagi sámegiela ja árbedieđu.
