Miehtá Finnmárkku lea politiijain leamas hušas idja.
Politiijat leat ožžon váidagiid sihke priváhta feasttaid ja gárrenolbmuid birra. Politiijat leat maid ožžon váidagiid alla musihka birra ja leat šaddan bissehit olu feasttaid ja doarrumiid miehtá Finnmárkku sotnabeaivvi čuovganeamis.
Hámmárfeasta:
Hámmárfeasttas ožžo politiijat mannan ija dieđu doarruma birra. Muhto go politiijat bohte dieđihuvvon čujuhussii, de ledje olbmot jávkan.
Seamma ija Hámmárfeastta politiijat ožžo dieđu ahte 20-jahkásaš nissonolmmoš lei gárreoaivvis váccašeame Hámmárfeastta guovddážis. Politiijat dolvo su ruoktot.
Guovžajávri
Finnmárkku politiijat ožžo dieđu feastta birra Guovžajávrris Mátta-Várjjagis sotnabeaivvi čuovganeamis. Priváhta čujuhusas čuojahedje beare alla musihka. Politiijat fitne doppe ja eaiggát oaččui váidaga politiijain.
Lávvordateahkeda politiijat ožžo dieđu ahte muhtin lei časkán 20-jahkásaš dievdoolbmo Guovžajávrris ja sihke ambulánsa ja politiijat bohte báikái. Albmás lei hávvi ja varddii olu, dieđihit politiijat.
Davvenjárga:
Mannan ija Davvenjárggas dieđihuvvo ahte muhtin dievdoolmmoš navdojuvvo časkán iežas moarsi. Politiijat isket dáhpáhusa. Bearašveahkalválddalašvuohta lea dieđihuvvon.
Čahčesuolu:
Mannan ija lei stuorra joavku nuorain čoahkkanan Čáhčesullo guovddážii. Sii doarrugohte ja sihke politiijat ja ambulánsa manne guovddážii. Guovttis dárbbašeigga divššu ambulánsabargiin maŋŋel go leigga huškojuvvon muhtinlágan vearjjuin, dieđihit politiijat.
Gilevuotna:
Sotnabeaivvi čuovganeamis lea muhtin dievdoolmmoš navdon loavkidan nuppi dievdoolbmo muhtin priváhta feasttas Gilevuonas, Finnmárkkus. Politiijat isket ášši.
