Várggát-fitnodat Finnmark Entreprenør AS lea ožžon bargun hukset geainnu. Šiehtadusa árvu lea 7,5 miljovnna kruvnna.
Forsvarsbygg galgá hukset geainnu plánejuvvon rádárhuksehussii mii lea Stuorraváris. Geaidnu šaddá oassin gieldda dálá geidnui Vuoksajávrri čáhcerusttegii. Geaidnobargu álggahuvvo skábmamánnu 4. beaivvi 2020, ja galgá plánaid mielde gárvvis čakčamánu 1. beaivvi 2021. Bargu bisána dálvemánuin.
– Bargu, mii dál álggahuvvo, lea vuosttaš lávki hukset ođđa rádárhuksehusa Várggáide. Mii ovttasbargat Várggáid gielddain ja mii leat dahkan šiehtadusa báikkálaš orohagain huksenáigodagas, dadjá Forvarsbygga prošeaktajođiheaddji Yngve Lorentsen sinpreassadieđáhusa bokte.
Báikkálaš entreprenevra vuittii šiehtadusa
Barggu entreprenevra lea Finnmark Entreprenør AS. Šiehtadusa árvu lea 7,5 miljovnna kruvnna oktan lassiárvodivadiin, ja das lea opšuvdna vel eanet bargguide main árvu lea 6,0 miljovnna kruvnna oktan lassiárvodivadiin. Šiehtadusa mielde galgá hukset 1,1 kilomehtera ođđa geainnu.
Gaskkohagaid lea veahá lossa johtolat huksenáigodagas
Mássaid geaseheapmi huksehusguvlui dagaha gaskkohagaid lossa johtolaga. Guovlu ja huksehus leat bures galbejuvvon.
Ođđa rádárhuksehus nanne Norgga suodjalusfámuid
Forsvarsbygg lea ožžon bargun hukset ođđa ja ođasmahttit dálá rádárhuksehusaid miehtá riikka, maŋŋá go Stuorradiggi mearridii ahte dálá rádárhuksehusaid sadjái galgá boahtit ođđa teknologiija dustet boahtteáiggi hástalusaid. Ođđa rádárhuksehusat leat mielde nannemin Norgga suodjalusfámuid, ja leat NATO čalmmit davvin.
Prošeavtta oppalaš huksenáigodat lea biddjon áigodahkii 2020-2027, muhto rievdá báikkis báikái.
