-Almmuhus-
OĐĐASAT– Hui somá oažžut luohttá­muša 

– Hui somá oažžut luohttá­muša 

-

-

Ođđa NBR jođiheaddji illuda deaivvadit ođđa stivrrain ja lohká leat dehálažžan joatkit bargguiguin maid leat álggahan. 

Lávvardateahket čađahii Norgga Boazosápmelaččaid  Riikkasearvi (NBR) válggaid, ja dán jagi lei maid jođiheaddji ámmátválga ja oktiibuot golbma kandidáhta ledje evttohuvvon. Loahppaboađus lei ahte Gåebrien Sijte boazosápmelaš Inge Even Danielsen (Trøndelága) oaččui eanemus jienaid. 71:s besse jienastit válggas ja Danielsen oaččui 36 jiena.

– Hui somá oažžut  luohttámuša. Mun ledjen jo árračavčča dieđihan ahte háliidan jođiheaddjin, dalle go ožžon jearaldaga, lohká NBR ođđa jođiheaddji, Inge Even Danielsen. Son lea doaibman jođiheaddjin maŋemuš áigge, nu diehtá makkár bargu lea vuordimis go dál galgá jođihit boazosápmelaččaid organisašuvnna.

Vuoruhit prošeavttaid ja boazodoallolága

Inge Even Danielsen muitala ahte dál lea dehálaš joatkit áššiiguin mat leat jođus. Son čujuha earret eará ahte ferte vuoruhit ja oažžut johtui prošeavttaid maid leat álggahan. 

– Ođđa boazodoalloláhka lea ášši mainna mii áigut čavgadit bargat ja vuoruhit, lohká son. NBR lea máŋga jagi gáibidan ahte olles boazodoalloláhka galgá geahčaduvvot, Ráđđehus lea dasa miehtan ja dál leat vuordimin boazodoalloláhkalávdegotti raportta. 

– Dál ii leat šat ágga, ja bargu ferte álggahuvvot go raporta almmuhuvvo, dadjá Danielsen. 

Buorre ovttasbargovuoibmi stivrras

NBR ođđa jođiheaddji illuda bargagoahtit ođđa stivrrain. Son lohká vásihan ahte lea buorre ovttasbargovuoibmi stivrras ja jáhkká dat joatkašuvvá go dál de ođđa stivra čoahkkana. 

– Mis lea leamašan hui buorre ovttasbargu stivrras. Dál illudan oahpásmuvvat ođđa stivralahtuiguin. Lea álo miellagiddevaš oahpásmuvvat ođđa olbmuiguin, lohká Danielsen.  

Čielga boađus

Ellinor Marita Jåma luobai NBR jođiheaddjin lávvardaga, ja lea gávcci jagi čohkkán ámmáhis. 

– Leat demokráhtalaš ja vuoiggalaš válggat. Riikačoahkkin lei hui čielggas gean háliidedje jođiheaddjin ja jáhkán dat leat stuorra oadjebasvuohta ođđa jođiheaddjái, lohká Ellinor Marita Jåma. 

Buorre ambassadevra NBR:i

– Inge Even lea hui starggas, ja sus lea ollu gelbbolašvuohta.  Son lea dat guhte čiekŋuda bures áššiide ja lohká visot dokumeanttaid. Láven leaikkastallat ahte son ferte šaddat čeahpibun geahččat bajás go hállá olbmuiguin, go son lea veaháš udju. Dál, go lea jođiheaddji, de ferte loktet oaivvi ja geahččat olbmuid čalmmiide, čaimmiha Ellinor Marita Jåma. Son lohká Inge Even Danielsena leat buorren ambassadevran organisašuvdnii ja sávvá sutnje ollu lihku ámmáhiin. 

Čeahpes almmái

Gielas orohaga boazosápmelaš Nils Ante Eira lei okta dan golmma kandidáhtas geat háliidedje NBR jođiheaddji ámmáha.  Son lohká  válggat ledje hui gelddolaččat ja miellagiddevaččat. 

– Inge Even lea čeahpes almmái, ja mun áiggun ollásit doarjut su barggu, dadjá Nils Ante Eira, guhte oaččui nubbin eanemus jienaid riikačoahkkimis. 

SÁVVÁ LIHKU: Gielas orohaga boazosápmelaš Nils Ante Eira. Govven: Inga Marie Guttorm.
SÁVVÁ LIHKU: Gielas orohaga boazosápmelaš Nils Ante Eira. Govven: Inga Marie Guttorm.

Sávaldat

Ledje golbma kandidáhta ja Nils Ante Eira oaivvilda ahte dat signalisere juoidá organisašuvdnii.

– Juoga mii lea lihkastan NBR:s, ja sávan ahte mii boahtteáiggis šaddat ovttaoaivilii válljet ovtta kandidáhta buori áiggis ovdal NBR riikačoahkkima, vai ii šatta dakkár gilvu nu go dál lei, dadjá Nils Ante Eira. 

 Demokratiija

–  Válggat ledje gelddolaččat, iige lean go moatti jiena duohken. Nu lea demokratiija, iige mus ii leat váivi. Sávan hui ollu lihku Inge Evenii dehálaš doaimmain masa dál lea válljejuvvon, lohká Eira.

-Almmuhus-