14 olbmo dušše heavvananlihkohisvuođain borgemánu. Danne leat 39 olbmo heavvanan Norggas mannan geasi, čájeha Gádjunsearvvi heavvananstatistihkka.
– Mii leat dađi bahábut fas vásihan dakkár geasi go ledje hui olu heavvananlihkohisvuođat. Dat surgadis logut deattuhit man dehálaš lea ahte nullavišuvdna, man ráđđehus mearridii diimmá borgemánus, čuovvoluvvo doaibmaplánain ja eanet resurssaiguin heavvananeastadanbargui, dadjá Gádjunsearvvi (Redningsselskapet) generálačálli Grete Herlofson preassadieđáhusas.
Astoáigefanas, vuojadettiin ja gahččan čáhcái
Buot earret okta geasi heavvananlihkohisvuođain dáhpáhuvve astoáigefatnasiin, vuojadettiin dahje gahččan čáhcái.
15 dievdoolbmo ja guokte nissonolbmo dušše astoáigefatnasa geavaheami oktavuođas, main okta lihkohisvuohta geavai raftedettiin. Seamma áigodaga diibmá heavvanedje 11 olbmo astoáigefatnasiin. Nuoramus olmmoš lei badjelaš goalmmátlotjahkásaš, ja boarrásepmosat badjel 80. Logis dain dievdduin geat dušše, ledje badjel 60-jahkásaččat, geain fas bealli heavvanii go gahčče fatnasa ja káija gaskii.
Guhtta nissonolbmo ja vihtta dievdoolbmo heavvanedje vuojadettiin geasset, mii lea guokte eambbo go diimmá geasi. Nuoramus lei 15-jahkásaš bárdni, boarráseamos fas dievdu badjel 80 jagi.
Bealli badjel 60 jagi
49 proseantta dain geat heavvanedje geasset ledje 60 jagi dahje boarráseappot.
– Vuorraset rávesolbmot dagahit stuorát ja stuorát oasi heavvananstatistihkas, ja 2040 guvlui leat vel eambbo ássit ahkejoavkkus 70-80. Eastadan dihte heavvanemiid, de fertet mii oktiiheivehallojuvvon ja guhkesáigásaš vugiin bargat dainna ahkejoavkkuin, dadjá Gádjunsearvvi heavvanemiid eastadanfágahoavda Tanja Krangnes.
