Golbma diimmu ii lean vejolaš riŋget politiija heahtenummirii 112 mannan duorastaga eahkeda. Dat lea hui duođalaš sivva, dieđiha Nkom sihkarvuođadirektevra Svein Scheie.
Nasjonal kommunikasjonsmyndighet (Nkom) áigu dál čađahit bearráigeahču Telenor fitnodagas maŋŋel go mannan duorastaga eahkeda lei veadjemeahttun riŋget politiija heahtenummira 112.
Politiijat dieđihedje mediaide borgemánu 29. beaivvi dii 21.00, ahte politiijaguovllut eai sáhttán oažžut dieđuid álbmogis sin heahtenummira 112 bokte. Telenor dieđiha ahte lea leamaš teknihkalaš sivva sis, mii maiddái čuozai Telia ja Ice mobiilageavaheddjiide. Heahtenummir 112, man Politiija geavaha, lea maiddái internationála heahtenummir mas galgá sáhttit gulahallat buot olbmuiguin geat bohtet Norgii olgoriikkas.
Hui duođalaš sivva
Nkomas lea ovddasvástádus dárkkistit ahte aktevrrain lea dohkálaš sihkarvuohta sin mobiilaneahtas. Dál leat sii mearridan čađahit bearráigeahču mannan vahku dáhpáhusa geažil.
– Mii oaidnit dan hui duođalažžan go čuožžila dakkár sivva mii váikkuha álbmoga vejolašvuođa riŋget heahtenummirii. Mii áigut dárkkistit mii geavai ja dárkkistit ahte dohkálaš sihkarvuođa gáibádusat leat čuvvojuvvon. Mii fertet dan dahkat oktan aktevrrain vai hehttet ahte dakkár dáhpáhusat gevvet fas, lohká Nkom sihkarvuođadirektevra Svein Scheie.
Nkom vuordá bearráigeahččoraportta gárvánit golggotmánu lohppii.
