-Almmuhus-
-Almmuhus-
-Almmuhus-
OĐĐASATHoahppu čielggadit buvttadeaddji dili

Hoahppu čielggadit buvttadeaddji dili

-

-

Go Liet Internašunála lávlungilvu galgá lágiduvvot Guovdageainnus skábman dán jagi, de ii leat dálá dili mielde Sámi Musihkkafestiválas buvttadeaddji dalle. Dálá buvttadeaddji lea virgáduvvon dušše geassemánu rádjái.

Sámi Musihkkafestivála stivrajođiheaddji Ellen J. Sara Eira muitala sii áigot geahčadit vejolašvuođaid virgádit buvttadeaddji ollesáigái.

– Mis lea stivračoahkkin fargga ja doppe leage ášši earret eará movt dahkat viidáseappot buvttadeaddji ektui. Mii áiggošeimmet buvttadeaddji fásta virgái, ja mis šaddagoahtá hoahppu, oainnat jus galgat almmuhit virggi dahje fállat dan dálá buvttadeaddjái Nils Johan Varsii, de ferte buot dahkkot ovdal geassemánu. Mis galgá buvttadeaddji sajis skábmamánnui go Liet lágiduvvo, lohká Sara Eira.

 

Dorvvastit Sámediggái

SMF lea bivdán čoahkkima Sámediggeráđiin, gos áigot digaštallat sihke Liet lávlungilvvu ja maiddái buvttadeaddjevirggi.

– Mis lea ekonomiija bealli stuora gažaldat, ja galgat dál miessemánus deaivvadit Sámediggeráđiin gávnnahit movt sáhttit bargat ovddasguvlui. Oainnán vejolašvuohtan loktet min fástadoarjaga maid oažžut Sámedikkis, dahje liigeprošeavtta bidjat johtui mii guoská sihke Liet-gilvui ja buvttadeaddjevirgái, lohká son.

 

Nuppástuhttit organiserema

Stivrajođiheaddji maid muitalaahte  čoahkkimis galgá festivála nuppástuhttin fáddán.

– Mis lea jođus bargu mas galgat nuppástuhttit Sámi Musihkkafestivála vuođđudusas oasusfitnodahkii. Vuođđudusas, ovdamearkka dihte jus hejot manná ekonomalaččat, de gahččá dat stivralahtuid ala, ja sii šaddet persovnnalaččat vealgugassan. Nu ii leat oasusfitnodagas, lohká son.

 

Nuppes vel lágidit

Vaikko ii leat vel mearriduvvon, de lea Sara Eira sihkar ahte Liet lágiduvvo skábman Guovdageainnus.

– Mii gal áigut fállat maŋit jagi maiddái váldet badjelasamet Liet-gilvvuid Guovdageainnus, lohká SMF stivrajođiheaddji Ellen J. Sara Eira.

 

 

 

 

 

 

 

 

-Almmuhus-