Politiijat váruhit dál olbmuid, rievváriin lea ođđa dájuhangoansta. Sii guđđet hivssetbáhpiriid summal olbmuid šiljuide, ja gáibidit mávssu.
Máŋgga sajis Norggas dieđihit politiijat hivssetbábir-dájuheami birra. Sihke Finnmárkku politiijaguovlu ja Sørvest politiijaguovlu dieđihit twitteris dan ođđa dájuhangoanstta birra.
– Muhtumat guđđet stuora hivssetbábirseahka vuorrasit olbmuid šilljui, ja maŋŋil fas gáibidit mávssu, čilge Kristian Myhra Sør-Øst politiijaguovllus NRK:ii.
Son lohká ahte dát lea oallugiid mielas unohas, ja vuorraset olbmot sáhttet dovdat iežaset bággehallan máksit.
Lobiheapmi jus ii leat diŋgon
Politiijat rávvejit olbmuid ahte eai galgga máksit, eai ge vuostáváldit hivssetbáhpiriid jus sidjiide fállet. Sii sihtet maid dieđihit politiijaide jus šaddá unohis dilli. Telemarksavisa čállá politiijat jáhkket ahte lea olgoriikkalaš fitnodat mii lea sivalaš dása.
– Jus kunddar ii leat diŋgon gálvvu, de lea lobiheapme, lohká Myhre aviisii.
Son deattuha ahte dát ii guoskka jus valáštallanjoavkkut leat vuovdime hivssetbáhpiriid.
– Dát hivssetbáhpirat leat vissa hui divrasat, mihá divrasit go dábálaččat, lohká Myhra. ©NTB
