Hivssetbáberfitnodaga Dragro Norway hoavda Torry Drange, šálloša go olbmot geat eai leat diŋgon hivssetbáhpáriid leat ožžon sis rehkegiid daid ovddas.
Dragro Norway hoavda, Torry Drange, mieđiha VG áviisii ahte leat bártašuvvan vuovdimiin ovdal juovllaid. Drange oaivvilda iežaset meaddán oalle máŋgii.
– Muhtin vuovdit viimmáskedje, šattai siskkáldas gilvu ja manai badjel bávtti. Muhto mii eat áiggo gáibidit ruđa olbmuin geat eai leat diŋgon, eat ge sis geat gáhtet diŋgojumiid maid leat dahkan, lohká Drange áviisii.
Maiddái Finnmárkku politiijaguovlu váruhii gaskavahko hivssetbáber-dájuhemiid vuostá.
Máŋgga sajes Norggas leat vuorrasat olbmot ožžon máksin gáibádusa hivssetbáhpiriid ovddas mat leat guđđojuvvon sin šiljuide.
Álggahan doaimmaid
Drange ii loga ovttage vuovdi biddjon eret barggus, muhto son lea ollislaččat geahčadan vuogádaga ja kvalitehtasihkkarastigoahtán vuovdimiid.
– Mis lea leamaš nu gohčoduvvon álkiduvvon doalvun. Muhto dat ii doaimma jus oasti vásiha ahte ii leat diŋgon gálvvu. Dál lean álggahan viiddis kvalitehtasihkkarastima, dat mielddisbuktá earret eará ahte diŋgojupmi galgá duođaštuvvot SMS dahje reivve bokte. Jus dat ii duođaštuvvo de sihkkut diŋgojumi. Oastis lea ollásit gáhtanvuoigatvuohta, lohká son.
Bivdán Geavaheddjiidáittardeaddji geahčadit ášši
Geavaheddjiidráđđi váruha olbmuid hivssetbáberfitnodaga Dragro Norway vuostá, maŋŋel go badjel 60 olbmo leat váldán oktavuođa Geavaheddjiidráđiin dán fitnodaga birra.
Diibmá bohte 50 jearaldaga, ja ođđa jagi vuosttaš golmma beaivves leat vel 16 duhtatmeahttumis hivssetbáberoažžu váldán oktavuođa Geavaheaddjiráđiin.
– Geavaheaddjit muitalit ahte ovdamearkka dihte leat ožžon hivssetbáber- ja gievkkanbábergubá ja rehkega. Váttisvuohta lea ahte eai leat goassege diŋgon dáid. Liikká olusat dušše mávssestit rehkega, go ballet inkássos ja máksinmearkkašumiide. Mii lohkat: allet mávsse, lohká Ingeborg Flønes, guhte lea Geavaheddjiidráđi geavaheddjiidbálvalusa direktevra.
Geavaheddjiidráđđi lea bivdán Geavaheddjiidáittardeaddji, mas lea ovddasvástádus bearráigeahččat dán suorggi, guorahallat Dragro.
(©NTB)
