Finnmárkku ja Romssa fylkkadikkit deaivvadit ihttin, maŋŋebárgga 31. beaivvi, Girkonjárggas. Doppe galget vihtta ášši meannuduvvot, earet eará ođđa regiovnna namma ja oktasaš lávdegoddi.
Stuorradiggi lea mearridan ovttastahttit davimus fylkkagielddaid ja ođđa regiovdna galgá doaibmagoahtit ođđajagemánu 1. beaivvi 2020.
Meannudit ođđa nama
Girkonjárggas galget fylkkagielddat meannudit ođđa fylkkagieldda nama ja galle áirasa galget ođđa fylkkadikkis.
Dál leat Finnmárkkus 35 áirasa ja Romssas 37 áirasa.
Gielda- ja ođasmahttindepartemeantta stáhtačálli Anne Karin Olli rahpá fylkkadikkiid deaivvadeami ja Mátta-Várjjaga sátnejođiheaddji Rune Rafaelsen váldá vuostá fylkkadikkiid Girkonjárggas.
