Dat 28. Riddu Riđđu šattai historjjálaš buorren, go ledje olahusat sihke ovttaskas doaluin ja obbalaš guosselogus.
Dat 28. Riddu Riđđu šattai historjjálaš buorren, go ledje olahusat sihke ovttaskas doaluin ja obbalaš guosselogus.
9200 olbmo fitne daid ollu seminárain, konsearttain ja eará doaluin festiválas. Dat lea diimmá ektui lassaneapmi olles 42, 6 proseantain, dieđihit Riddu Riđu lágideaddjit preassadieđáhusas.
– Buoret go ledjen smiehttan
Viidáseappot čállet ahte olbmot liikojedje bures prográmmii mii dán lei dán jagáš Riddu Riđđu festiválas. Olbmuin lei buorre mokta, ja máŋggat seminárat ledje nu dievva ahte ollugat šadde uvssas jorggihit.
– Festivála šattai ollu buoret go goasse ledjen smiehttan, dadjá festiválahoavda Sandra Márjá West preassadieđáhusas.
– Lean ilus go nu ollugat ledje boahtán dán jagáš Riddu Riđđui, ja lean maid hui rámis mot Riddu-bargit ja eaktodáhtolaččat leat nákcen váldit vuostá ollu olbmuid, seammás go sihkarvuohta lea bures doaimmahuvvon, dadjá son.
Gehččiid oiddohat
Buffy Sainte-Marie geasuhii ollu olbmuid, ja lávddi ovddabealde lei spagga dievva olbmuiguin lávvordat eahkeda, ja ovttas Tanya Tagaqiin, Maxida Märakiin, Slincrazein, Rubeniin og ISÁK:in ledje ge sii gehččiid oiddohat. Nu lei maid intimakonsearta tuvanalaš čottalávlumin.
– Álgu juoga stuorrái
Dán jagi nuorra dáiddár, Emil Karlsen, lei oidnosis máŋgga lávddis, Mánáidfestivála rájes gitta Duohtavuođa- ja seanadankommišuvnna rádjái. Boahtte jagi áigu ge son ráhkadit iežas dáiddalaš prošeavtta, mii vuohččan čájehuvvo boahtte jagáš Riddu Riđđus.
– Emila dáiddabarggut lea álgu juoga stuorrái, lohká festiválahoavda.
Loahpas čállá Riddu Riđđu lágideaddjit preassadieđáhusas, ahte buot seminárat ledje dievva, mii muitala ahte festiválagussiin lea beroštupmi ja áŋgiruššan.
