Disdaga iđida bártidii guollefanas go fanasmutuvra ii šat doaibman, ja báikkis lei garra biegga mii dagahii gádjuma váttisin.
Disdaga čuovganeapmái, diibmu 07:30, gájui Seaking helikopter guokte olbmo geat leigga šaddan vuodjat gáddái Máhkira lahka, Báhcavuona suohkanis.
Váttis bargu
Politiijat muitalit ahte lei hui váttis gádjunbargu dálkki dihte.
Gádjunfanas «Reidar Von Koss» ja guokte eará fatnasa, mat bohte veahkkin, eai nagodan boahtit doarvái lahka fatnasa mii lei bártidan ja gádjut dan guokte guolásteaddji.
Seaking maid bártidii garra biekka dihte go galggai seaivut.
Nagodeigga gáddái vuodjat
Dievddut, geat leigga fatnasis, nagodeigga gádjunbiktasiiguin vuodjat gáddái.
Finnmárkku politiijat veahkehedje dievdduid go olliiga gáddái, ja sihke politiijat, Rukses Ruossa, Siviilasuodjalus ja dearvvašvuođabargit ledje gohččojuvvon boahtit báikái.
Ovdalaš diibmu 07:00 ložžii dat vearrámus biegga, ja Seaking nagodii seaivut báikái ja viežžat dan guokte dievddu. Seaking doalvvui sudno Báhcavutnii, ja soai leaba buori vuoimmis, dieđihit politiijat.
– Finnmárkku politiijat giitet buohkaid geat serve gádjumii, go lei hirbmat váttis dilli, muitala Finnmárkku politiijaguovllu oktasaš operatiivvalaš ovttadaga jođiheaddji, Lars Blix Olsen preassadieđáhusas.
