-Almmuhus-
-Almmuhus-
OĐĐASAT Hilgu Norgga ja Suoma luossašiehtadusa

Hilgu Norgga ja Suoma luossašiehtadusa

-

-

Sámedikki dievasčoahkkin hilgu Norgga ja Suoma šiehtadusevttohusa guolásteami birra Deanočázádagas ja guoskevaš reguleremiin. Šiehtadus rihkku báikki olbmuid guhkesáiggi ja árbevirolaš guolástanvuoigatvuođaid.

Sámediggeráđđi Silje Karine Muotka lohká ahte šiehtadusas váilu báikkálaš doarjja ja legitimitehta dan sivas go Norgga dahje Suoma beale sámedikkit, gielddat mat gusket čázádahkii, Finnmárkku Fylkkadiggi ja Finnmárkku stuoradiggeáirasat dahje báikegottiid olbmot, geain leat vuoigatvuođat, eai doarjjo dán šiehtadusa.

 

 – Luossa lea deaŧalaš buohkaide geat ásset Deanočázádaga bálddas, ja danne leat buohkat ovttamielalaččat dasa ahte geahpedit bivddu, muhto mii fertet vuoruhit báikegottiid olbmuid bivddu turistabivddu ovddabeallái, lohká sámediggeráđi Silje Karine Muotka.

 

Sakka geahpedan bivddu

Šiehtadusbeliin Norggas ja Suomas eai leat leamaš buori proseassat singuin geain leat vuoigatvuođat, eaige leat váldán vuhtii báikegottiid olbmuid árbedieđu.

 – Deanočázádaga fierbmebivdit leat sakka geahpedan iežaset bivddu maŋimuš jagiid, ja dasa lassin lea fierbmebivdiid lohku maid sakka unnon, seammás go turistabivdu Suoma bealde lea lassánan nu ahte eai nagot bearráigeahččat, lohká Muotka.

(Ášši joatká Gova vuolábealde)


Luossa lea deaŧalaš buohkaide geat ásset Deanočázádaga bálddas ja mii fertet vuoruhit báikegottiid olbmuid bivddu turistabivddu ovddabeallái, lohká Silje Muotka. Vuorkágovva: Sara Maret Ravdna Oskal

Čuohcá mearraluossabivdiide

Sámediggi čujuha ahte lea juo oktavuohta organisašuvnnaid ja vuoigatvuođalaččaid gaskka ja sis lea duohta dáhttu šiehtadallat nu guhká go dat dáhpáhuvvá iežaset ja báikkálaš eavttuid mielde. Sámediggi áigu maid lasihit ahte Norgga beale mearraluossabivdiide čuohcá dát regulerenevttohus sihke njuolgga ja eahpenjuolgga.

 – Mearraluossabivdu Norgga bealde lea reguleremiiguin garrasit geahpeduvvon maŋimuš jagiid, ja šiehtadus lea lassiáittan dán árbevirolaš bivdui, lohká Muotka.

 

Suorganan ja hirpmástuvvan

Norgga beale Sámediggi lea ovttajienalaš mearrádusas dadjan ahte dán šiehtadusa ii galggaše Stuoradiggi dohkkehit.

 – Justa seammalágan čielga vuordámuša lea Sámediggi ovddidan ráđđehussii go lea leamaš oktavuohta dán áššis. Danne leat sakka suorganan ja hirpmástuvvan go ráđđehus lea válljen badjelgeahččat sin čielga jiena geaidda ášši báikkálaččat guoská, lohká Muotka.

 

– Mii doaivut ahte šaddet konstruktiivvalaš gulahallamat Stuoradikki bellodagaiguin vai eastadivččiimet ahte min guolleresurssat juogaduvvojit vel eanet boastut, lohká Silje Muotka.

- Advertisement -
-Almmuhus-