-Almmuhus-
OĐĐASATHilgon bálkášiehtadallamiid ráđđealbmáin

Hilgon bálkášiehtadallamiid ráđđealbmáin

-

-

Ráđđeolmmái Elfrid Boine lea gáibidan bálkášiehtadallamiid, muhto politihkalaš jođiheapmi lea dan hilgon.

Odne beakkehii ge ahte ráđđealmmái Elfrid Boine luohpá ámmáhis ja lea juo čorgegoahtán iežas kantuvrra. Dál leat Ávviris sihkkaris dieđut ahte galgá leat heajos gulahallan ja bálkásoahpameahttunvuohta gaskal Kárášjoga ráđđealbmá Elfrid Boine ja Kárášjoga politihkalaš jođiheami. 

 

Bálká ii leat lassánan guovtti jagis

Elfrid Boine lea doaibman ráđđealmmájin guokte jagi, muhto su bálká ii leat lassánan dan áiggis.

Boine lea ge gáibidan bálkášiehtadallamiid maid politihkalaš jođiheapmi lea hilgon. Politihkalaš jođiheapmi ii hálit čađahit bálkášiehtadallama ovdal go čakčat.

 

Loga maid: Luohpan ráđđealmmájin

 

Dáhtton sirdot eará sullasaš virgái

Ávvira sihkkaris gáldu muitala ahte ráđđealmmái lea dáhtton luvvejuvvot ráđđealbmávirggis ja sirdot eará sullasaš virgái gielddas, ja politihkalaš jođiheami áddejupmi lea ahte Boine lea cealkán eret virgi.

Ráđđealmmái Elfrid Boine lea mannan bearjadaga sádden diehtojuohkima e-poastta bokte gieldda hálddahusa jođiheapmái, mas ovdan boahtá ahte luohpá ráđđealbmávirggis. 

 

Ávvir ii leat fidnen ságáide Elfrid Boine, iige sátnejođiheaddji Svein Atle Somby kommenteret ášši.

-Almmuhus-