-Almmuhus-
OĐĐASATHilgojuvvon biila bázii Oalgevárrái

Hilgojuvvon biila bázii Oalgevárrái

-

-

Oalgevárrái, Kárášjogas, lea muhtin guođđán hilgojuvvon biilla. Politijat muitalit ahte sii leat gullan biilla birra ovdal, ja áigot dál ođđasit iskat ášši.

Gaskavahku leat vázziolbmot fuobmán ahte muhtin lea guođđán biilla Oalgevári luotta ala.

Biillas leat galbbat váldon eret, ja orru dego guđđojuvvon agibeaivái. 

Oalgevárri lea beakkán hárje­hallanguovlu ja lea maid Bearal­tuvra Kárášjogas. Jus biila ii čorge­juvvo eret, de lea das ollu mii sáhttá nuoskkidit luonddu. 

Biila lea Volkswagen Bora mii orru ráhkaduvvon birrasii jagi 2000. Biillas lea silba ivdni.

 


Dát galba muitala ahte Oalgevárrái ii leat lohpi vuodjit. 
Govven: Roy Arthur Olsen

Ovddasvástádus

Lea eaiggáda ovddasvástádus doalvut eret biilla, ja jus biilla eaiggát ii gávdno, de lea gielda mii lea nuoskkidaneiseváldi ja galgá čorget. 

Sihke gielda ja politiijat áigot čuovvulit ášši.

– Mii fertet dieđus gieldda bealis váidit ášši jus biilaeaiggát ii ieš viečča biilla eret, eaiggáda gal galgá vejolaš gávdnat vaikko vel eai leat ge galbbat, dadjá Nils Ásllat Kildedam, geas lea dál luomuáigge ovddasvástádus biras­gáhttenossodagas Kárášjoga gield­da birasgáhttenossodagas. 

 

Ii leat lohpi vuodjit

Oalgevárrái ii leat rabas luodda, ja doppe lea maid galba mii muitala ahte dohko ii leat lohpi vuodjit mohtorfievrruin.

Go Ávvir finadii doppe, de lei geaidnocaggi, mii galgá giddet luotta, rabas. 

– Dat lea gal čievraluodda mii manná dohko bajás, muhto gielda ii áimmahuša dien luotta. Die lea priváhta luodda. In oro jáhk­kime ahte lea lohpi vuodjit dohko, muitala Kildedam. 

 


Biillas leat láset cuvkejuvvon. Orru gurrejuvvon guođđin ládje. 
Govven: Silje Malene Varsi

 

Ii leat dieđihuvvon suoláduvvon

Politijat muitalit ahte sii leat gullan biilla birra ovdal, muhto eai diehtán ahte biila lea dál Oalgeváris. 

– Mii leat gullan silba Volkswagen Bora birra, mas eai leat galbbat, Kárášjogas. Muhto dan gal eat diehtán ahte biila lea dál Oalgeváris. Biila ii leat dieđi­huvvon suoláduvvon, muhto mii iskat ášši. Mun in sáhte muitalit makkár oktavuođas mii leat gullan biilla birra ovdal, dadjá Finn­márkku politiijaid preassaokta­vuohta.  

 

Biilavuostáváldinbáiki

Lea stuora proseassa ásahit biilavuostáváldinbáikki.

Leat hui garra njuolggadusat maid ferte čuovvut, ja Kárášjoga gielddas eai jáhke leat dárbbu dákkár vuostáváldinbáikái.

– Kárášjogas eat sáhte váldit vuostá hilgojuvvon biillaid. Eat goit gieldda bealis. Lea oalle stuora ja divrras proseassa ásahit dákkár vuostáváldima. Mun in jáhke dáppe oba ge dárbbu vuostá­váldinbáikái, muhto livččii dieđusge buorre jus muhtin fitnodat finašii viežžame boares biillaid, nu go duo moadde jagi áigi barge, loahpaha Nils Asllat Kildedam. 

-Almmuhus-