-Almmuhus-
KULTUVRAHellodatbotta noidošit Kárášjogas

Hellodatbotta noidošit Kárášjogas

-

-

Dán vahkkoloahpa bohtet noaiddit kurssa doallat Kárášjohkii. Suohkanbáhppa gal sávvá olbmuid baicce boahtit girkostallat.

 – Mun gal diehttelasat sávan olbmuid boahtit girkui baicce, muhto in sáhte bágget geange. Jáhkán goittot girkostallama eanet ávkin olbmuide go diekkár kursa, dadjá Kárášjoga suohkanbáhppa Franziska Förster.

 

Ii leat beroštuvvan

Fredrik Prost ja Randi Leiknes dat boahtiba Kárášjohkii doallat Šamanismmalaš dahje Noaiddástallan bargobáji miessemánu 22.-24. beivviid. Soai oahpaheaba ja muitaleaba luondduvuđot vuoiŋŋalašvuođas ja máilmmiáddejumis mas vuolggasadjin leat sámi árbevierut.

Bargobáji facebook-siiddus čállet ahte árbevirolaš sámi máilmmiáddejumi mielde lea buot luonddugáhppálagain siellu ja dat lea filosofiija mii addá ráfi ja fámuid. Bargobájis ohppet oassálastit nannet iežaset fámuid.

Förster deattuha ahte son ii lean gullan dán kurssa birra ovdal go Ávviris gulai, ii ge dieđe maid barggažet diekkár bargobájis.

 – In ge leat gal nu beroštuvvan diehtit ge dieid birra, nu mo várra áddet, čaibmá suohkanbáhppa.

 


Kárášjoga suohkanbáhppa Franziska Förster
Vuorkágovva: Astrid Helander

Suohkanbáhppa lohká iežas diehtit ahte ii buohkain leat jáhkku dasa maid girkus dahket.

 – Ja dan ferten vuhtiiváldit, dadjá son.

 

– Olbmuin oskufriddjavuohta
Ii Kárášjoga searvegotteráđi jođiheaddji Mette Anti Gaup, ge loga iežas ovdal gullan dán bargobáji birra. Son ii loga iežaset gal gieldit geange searvamis dákkár kursii.

 – Olbmuin lea oskufriddjavuohta, iešguđet lágan oskut ja oaivilat. Muhtimat jáhkket dákkáriidda ja eat mii gal gieldde geange dan dahkamis, dadjá Gaup.

 

– Muhtimat jáhkket diekkáriidda vaikke leat risttalaččat

Iige Gaup loga olbmuin leat dušše iešguđetlágan oskku.

 – Muhto ii buohkain leat dat risttalašvuohta ge seammalágan. Mun dieđán ahte min searvegottis maid leat olbmot geat čáhkkehit dákkár oskkuid risttalašvuhtii, geat jáhkket dákkár vuoiŋŋaide ja dasa ahte eatnan ja almmi gaskkas lea eanet go maid mii oaidnit. Seammás leat min searvegottis maid muhtimat geain ges lea hui garra risttalaš osku, geat eai dohkkehivčče noaiddástallamiid, čilge son.

 

Viiddidit diđolašvuođa

Iešguđetlágan mediterenvugiid ja rumbbu bokte, lea vejolaš ovdánahttit ja nannet intuitiiva ja kreatiiva fámuid mat olbmuin leat, čállet lágideaddjit.

 – Min diđolašvuohta das ahte beassat oktavuhtii luonddu dálkkodeaddji fámuin, sáhttá viiddiduvvot. Vulget mielde mátkái ja ságastallamii luonddu mytologalaš duovdagiid birra, čállet lágideaddjit siiddus.

 

Facebook-siiddu dieđuid mielde leat Leiknesas ja Prostas olu vásáhusat luondduvuđot vuoiŋŋalašvuođas, sjamanismmas.

Soai leaba dovddus noaiddi Ailo Gaup oahppit leamaš ja leaba čuvvon su kurssa čieža jagi. Goappašagat leaba maid iešheanalaččat bargan máŋggaid jagiid.

 – Kursadoallit áiguba dán vuoru fokuseret sámi noaidevuođa birra iežaska vásáhusaid, sohkaárbevieruid ja máttuid viissisvuođa joga vuođul, čállet lágideaddjit.

Kursa dollo Kárášjogas, dasa lassin galget maid galledit muhtin bassi báikki.

 

Bargobaji lágideaddjit eai hálit kommenteret áššái.

-Almmuhus-