-Almmuhus-
-Almmuhus-
-Almmuhus-
OĐĐASATHelga Pedersen Bb presideantaevttohassan

Helga Pedersen Bb presideantaevttohassan

-

-

Bargiidbellodaga (Bb) sámepolitihkalaš konferánsa lea válljen Helga Pedersena sámediggepresideanta evttohassan ja Ronny Wilhelmsena ges várrepresideanta evttohassan.

Dán vahkkoloahpa lea Bargiidbellodaga sámepolitihkalaš konferánsa, doppe válljejedje ovttajienalaččat deatnolačča Helga Pedersensa bellodaga sámediggepresideanta evttohassan, čállá NRK Sápmi.

 

Golbma evttohasa

Várrepresideanta ámmáhii ledje ges golbma evttohasa.

Konferánsa válljii áltálačča Ronny Wilhelmsena 28 jienain.

Kåre Olli jienastedje ovccis ja John Kappfjell ges golmmas.

 

– Giella ii leat váttisvuohta

NRK Sámi dieđuid mielde eai lean buohkat duđavaččat bohtosiin.

– Evttohasat gal leat doarvái buorit, muhto ii leat buorre signála go mis leat njunnošat geat eai máhte sámegiela, seammás go galgat ovddidit ja rahčat giela ovddas, lohká porsáŋgulaš Ida Kathrine Balto.

 

Pedersen ieš ii ane gal dán váttisvuohtan:

– Ferten dušše šállošit go in máhte sámegiela, lohká son.

Pedersen oaivvilda leat boastuvuohtan jus dakkárat geat eai hálddaš sámegiela hilgojuvvojit dehálaš ámmáhiin.

– Mii fertet baicce bargat dan ala ahte eambbosat ja nuorat ožžot vejolašvuođa oahppat ja hálddašit sámegiela, lohká Helga Pedersen.

 

Árabus dán čavčča válljii Norgga Sápmelaččaid Riikkasearvvi jahkečoahkkin Aili Keskitalo iežaset presideantaevttohassan, ja Árjja liige jahkečoahkkin ges válljii Inger Eline Eriksena bellodaga presideantaevttohassan boahtte jagi válggaide.

-Almmuhus-