-Almmuhus-
-Almmuhus-
-Almmuhus-
VALÁŠTALLAN– Heive unna gasibuš olbmuide

– Heive unna gasibuš olbmuide

-

-

Jus háliidat šaddat seamma čaffadis valáštallin go Ole Johnny Eriksen, de lea dus dál vejolašvuohta. Su vuosttaš hárjeheaddji álggaha oainnat dál MMA heaibun searvvi Kárášjohkii.

Mixed Martial Arts (MMA)

Ođđaáigásaš MMA vulggii antihka olympialaš gilvvuin ja pankrationas, mii lea okta dain doarrunvaláštallamiin maid leat áramusat dokumenteren.

 

Dán áigge lea MMA dakkár valáštallan mii dáhpáhuvvo ráddjejuvvon sajis, dávjá rieggá dahje buvrra siste.

 

Gilvvut sáhttet leat iešguđet dásiin nu mo mearkagilvvut, aittoálgi, semi-profeššunealla ja profeššunealla dásis.

 

Valáštallamis geavahit iešguđet lágan teknihkaid, ja leat erohusat ja ráddjejumit dásiid mielde.

Teknihkat maid sáhttá geavahit lea huškun, čiekčan, čippiid geavaheapmi ja gargŋiliid geavaheapmi. Dasa lassin sáhttá iešguđet ládje bálkestit nuppi, njeaidit nuppi ja maiddái buvihan- ja lohkkadanteknihkaid geavahit go lea veallut.

 

MMA namma boahtá ge das go valáštallamis geavahit iešguđetlágan teknihkat mat maiddái gávdnojit eará doarrunvaláštallamiin.

 

Dán áigge dattege sáhttá lohkat ahte valáštallan lea rievdadan eanaš teknihkaid nu ahte šaddet sierra teknihkat, ja maiddái fuomášan olu ođđa erenoamáš teknihkaid.

 

Gáldu: nmmaf.no

Lars Robert Helander álggaha vuossárgga MMA heaibunhárjehallamiid ja searvvi Kárášjogas, son lea ieš ovdal jođihan MMA-searvvi Romssas (TSI Basketak) ja hárjehallen MMA valáštallama 6 jagi.

– Dál lean fárren deike Kárášjohkii ja šattai miella álggahit dákkár searvvi. Mu mielas orro dat buorre astoáigedoaibma mii ovdánahttá olbmo sihke rumašlaččat, silolaččat sosiálalaččat.

 

Silolaččat ávki

Lars Robert bargá ieš psykologan Kárášjogas, ja go Ávvir jearrá ahte mo bat dákkár valáštallan sáhttá ovdánahtti olbmo silolaččat, de buktá son ovdán ovdamearkka:

– Jus leat mahkáš hui unni šaddui, dahje nissonolmmoš ja de hárjehallagoađát MMA. Go de leat hárjehallan mat jahkebeali de sáhtát nu čehppon ja givron ahte nagodat stuorra almmái olbmo bonjastit vuollái dakkaviđe. Jáhkán dakkár vásáhusaid sáhttit nannet olbmo iešgova ja iešdovddu, čilgesta son.

 

Eriksena vuosttaš hárjeheaddji

Sámis lea okta oalle beakkánis MMA valáštalli go lea gilvvohallan miehtá máilmmi dán valáštallamis.

Eriksen ieš lea maid muitalan mo son givssiduvvui mánnán ja ahte MMA valáštallan lea nannen su silolaččat.

 

Lars Robert muitala ahte son lei Eriksena vuosttaš hárjeheaddji.

– Lei hui somá oaidnit ahte Ole Johnny namuhii mu ja veahkehii juohkit dan dieđu facebookas ahte lean álggaheamen dákkár hárjehallamiid Kárášjogas, lohká Helander.

Iige das galle, Eriksen boahtá maid Kárášjogas fitnat hárjehallamiin.

– Jua, son doallá dálvet seminára sidjiide geat servet hárjehallamiid. Dasa lassin bohtet maiddái Romssas MMA valáštallit fitnat dáppe doallamin semináraid, muitala hárjeheaddji.

 

Roavva valáštallan

MMA valáštallan lea oalle roavva valáštallan, gos lea lohpi sihke huškut, čiekčat, buváhaddat ja nu ain, Helander goittot ge ii loga plánen dieid teknihkaid oahpahit ovddemuš.

– Mun lean jurddašan veaháš vuordit daid garra ja váralaš teknihkaid oahpaheames, dassážii go oahppit leat vuos oahppan kontrolleret iežaset rupmašiid. Jus dohko bohtet dakkár «alpha males» geat áiggošit veahá almmáštallat de mun gal jođánit mudden sin, čaibmá son.

 

Vaikke hárjeheaddji mieđiha ge ahte lea roavva valáštallan, de deattuha ahte ii leat doarrun.

– Mun áiggun atnit oadjebas rámmaid guovddážis, dat leat hui dehálaččat go lea dákkár valáštallan. Ja háliidan álggus fokuseret sámi jiu-jitsu oahpahit.

Hárjehallamiidda leat buohkat buresboahtimat sihke almmáiolbmot ja nissonat, beare leat deavdán 14 jagi. 

Hárjehallamat leat Kárášjoga mánáidskuvlla lašmmohallanlanjas ja vuosttaš hárjehallamat leat vuossárgga ja maŋŋebárgga 26. ja 27 beivviid skábmamánus.

(Ášši joatká gova vuolábealde)


ROAVVA VALÁŠTALLAN: MMA valáštallan lea roavis, muhto Lars Robert ii gohčot dan doarrun gal.
Priváhta govva

Heivehan unna gassa sápmelaččaide

Jiu-jitsu lea dakkár doarrunvaláštallan mii dáhpáhuvvá láhttis, das ii galgga čiekčat iige huškut.

– Dán málles sáhtát 100 proseantta geavahit návccaid ja liikká it roasmmehuhte nuppi, das oahpat teknihka ja rupmaša kontrolleret, čilge son.

Máilmmis gávdnojit olu jiu-jitsu mállet, dovddusebmos dáidá leat brazilian jiu-jitsu, muhto Helander lea leamaš mielde hápmemin sierra sámi jiu-jitsu málle.

– Dat lea dakkár mii heive oanehis ja gasibuš olbmuide, nu mo sápmelaččat dávjá leat. Ja dakkáriidda geat leat giehtagievrra, nu mo boazodoallit, guolásteaddjit ja boanddat dávjá leat. Dán málles geavahat maiddái buvihanteknihkaid, muhtimat dain gáibidit guhkes gieđaid ja de leat mudden ja rievdadan teknihkaid nu ahte heivejit sápmelaččaide geat eai leat buohkat nu guhkit. Thai-boksemis ovdamearkkadihte lea ovdamunni leat guhki, ja dat ii álot soaba sápmelaččaide, čaibmá son.

 

Sámegillii hárjeha

Lars Robert Helanderis lea maid eará jurdda duohken, dál go álggaha MMA hárjehallamiid, nammalassii sámegiella.

Sus lea oainnat sámegiella nubbingiellan, ja hárjehallamiid bokte háliida oahppat vel eambbo sámástit, danne lea plána sámegillii čađahit hárjehallamiid.

– Jus háliidehpet ahte galggan din oahpahit jiu-jitsu, de fertebehtet munnje oahpahit sámegiela nu ahte máhtán eambbo go dušše gievkkangiela, lohká son.

 

 

 

-Almmuhus-