Norgga álbmotmusea válddii eret vávváid gávppis, go moitojuvvui vuovdimis «fake» sámi kultuvrra.
Norgga álbmotmusea válddii eret vávváid gávppis, go moitojuvvui vuovdimis «fake» sámi kultuvrra.
Mannan vahkus moittii Ann Kristine Balto Norgga álbmotmusea go vuovdalii iežaset museagávppis vávváid main leat goanstagávttit ja galge sulastahttit sápmelaččaid. Dál leat Norgga álbmotmusea váldán vávváid eret vuovdimis museagávppis.
Heaitán ovttatmanos
Musea gussiidossodaga jođiheaddji Paal Mork lohká sii leat juo heaitán vuovdimis daid sámi inspirerejuvvon vávváid.
– Dát leat duhkorasvávvát main lea sihke hápmi ja biktasat álkiduvvon. Dat duhkorasvávváráidu lea inspirerejuvvon sihke Norgga bunádain ja sámi gávttiin, muhto maŋŋel go oaččuimet moaitámuša daidda, de lea min sámi fágaolmmoš árvvoštallan daid. Boađus das lea ahte mii heittiime ovttatmano vuovdimis dáid, muitala Mork.
Norgga álbmotmusea ii áiggo eisege vuovdit kopiijaid mat ovdanbuktojuvvot albma ja autenttalaš sámi buvttan iežaset museagávppis, lohká musea gussiidossodaga jođiheaddji.
Eai doivon sehkket
Mork čilge musea lei álggos árvvoštallan ahte vávváid gárvvut ledje nu ollu álkiduvvon ahte daid ii sáhte sehkket albma gávttiiguin.
– Vávvát ledje hui dárkilit merkejuvvon ahte dat leat importerejuvvon Duiskkas ja dat leat duhkorasvávvát. Danne eat lean jáhkkán ahte oktage moaitá daid. Muhto mii atnit árvvus go sámi birrasis boahtá reakšuvdna, eatge de vuovdde šat daid, lohká Mork.
Dáhtošii albma buktagiid
Morkas lea ipmárdus go sápmelaččain lea ballu ahte sámi kultuvra ovdanbukto boastut dákkár «fake» buktagiid bokte.
– Mii eat lean dien jurddašan, ja min bealis gal eat áiggo eisege vuovdit juoidá mii lea kopiija ja dat ovdanbuktojuvvo albma ja autenttalaš sámi buvttan. Son mieđiha ahte sis eai leat nu ollu sámi buvttadeaddjit geat sáhttet buktit buktagiid sin museagávpái.
– Norgga álbmotmusea dáhtošii vuovdit eanet sámi buktagiid, ja háliidivččii rávvagiid buvttadeddjiid birra geat sáhttet skáhppot albma sámi buktagiid, lohká Mork.
