Trøndelága politiijaguovlu oaččui ikte, gaskavahku, dieđu diibmu 11:58, dieđiheaddjis gii soaittáhagas gávnnai heavvanan albmá Troandima guovddážis.
Politiijat gávdne albmá Ravnkloa nammasaš báikkis, Troandima guovddážis, ja gádjunveahka duođaštii albmá jápmán birrasii čieža minuhta maŋŋel go politiijat ožžo dieđu.
Dalle lohke politiijat ahte lea beare árrat diehtit lea go sáhka vearredagus.
Olgobáikki lahka
– Leat áššit mat orrot čájeheamen ahte almmái lea geavvan čáhcái go ii oktage leat oaidnán ja ahte dat sáhttá leat geavvan oalle maŋŋit ihkku. Dasa lassin leat mii báikkis, gos lea olgobáiki lahka, gos son sáhttá leamaš guossin, dajai politiija doaimmahanhoavda Tonje Westad TV2:i ikte.
Váttis dovdat
Politiijat lohke gaskavahku váttisin dovdat albmá, go lei nu guhká leamaš čázis, vaikko albmás ledje báhpárat mat duođaštedje su identitehta.
Dasa lassin ii lean oktage dieđihuvvon láhppon guovllus, gos almmái gávdnui.
Rumašiskkadeamis
Krimvakta politiijat bargagohte áššiin viidáset gaskavahkku ja duorastaga sáhtii Geir Langås muitalit albmá sáddejuvvon rumašiskosii.
Politiijain ii leat makkárge sivva navdit vearredahkun dáhpáhusa ja leat čađahan maiddái vihtangažadeami.
Unnán dieđut
Son sáhtii duođaštit ahte lei sáhka almmáiolbmos, gii lei heavvanan. Agi sii eai háliit vuos almmuhit, go leat ain bargamin identitehta duođaštemiin.
Son iige háliit vástidit sáhttá go almmái leamaš Tråante2017 doaluid oasseváldin.
– Lea sáhka albmás, gii lea heavvanan, iige leat eret Troandimis. Dat lea buot maid mun sáhtán muitalit justa dál, lohká Langås Ávvirii.
