-Almmuhus-
-Almmuhus-
OĐĐASAT Heajos jiekŋa rittus, buoret jiekŋa duoddaris

Heajos jiekŋa rittus, buoret jiekŋa duoddaris

-

-

Norgga čázádat- ja energiijadirektoráhtta váruha olbmuid johtimis sahtedohko jieŋa alde. Dál manná giđa guvlui ja jiekŋa lea heajos dilis riddoguovllus gitta Nordlándda gaskkamuddui. Vaikko duoddaris lea buorre jiekŋa, de berre leat várrugas gokko lea garra rávdnji dahje  čáhcefápmorusttegiid reguleremat.

Norgga čázádat- ja energiijadirektoráhtta (NČE) muittuha olbmuid dárkkistit jieŋa. 

– Giđđajiekŋa lea váralamos jiekŋa, lohká NČE jiekŋadieđiheaddji Ånund Kvambekk ođasreivves.

Son muitala ahte olu heavvaneamit lea dáhpáhuvvan go olbmot, geat bivdet jieŋa alde, mannet menddo lahka jávrri oivoša, gos várra guolli dohppe buoremusat. Árrat dálvit sáhttá mannat measta jiekŋaravdii, muhto giđđajiekŋa lea behtolaš go  fáhkka ii suvdde jiekŋa olbmo.

Kvambekk čilge ahte ihkku soaitá jiekŋa suvdit olbmo, muhto beaivit ii suvdde šat. Lohká ahte muohta suddje jieŋa, muhto go muohta lea suddan, de suddagoahtá jiekŋa. 

– Bajit eatnamis váris ja Romssas ja Finnmárkkus suddje velá muohta jieŋa bures go giđđa ii leat nu guhkás joavdan. Dás berrejit olbmot garvit jieŋa mii lea garra rávnnji bokte nu go oivošiid, njálmmiid ja baskkes nuriid. 

Jiekŋakárttas, iskart.no,  sáhttá gávdnat heajos jieŋa merkejuvvon ruoksadin.

-Almmuhus-