Iskkus mii buohtastahttá Norgga ja Ruoŧa bátnedivššu, čájeha ahte leat sosiála erohusat movt olbmot geavahit bátnedikšunbálvalusa ja makkár erohusat leat bátnedearvvašvuođas.
Iskkus mii buohtastahttá Norgga ja Ruoŧa bátnedivššu, čájeha ahte leat sosiála erohusat movt olbmot geavahit bátnedikšunbálvalusa ja makkár erohusat leat bátnedearvvašvuođas.
Statistihkalaš Guovddášdoaimmahat (SSB) lea vuosttaš geardde čađahan iskosa mas leat buohtastahttán olbmuid bátnedearvvašvuođa ja ruhtadeami Norggas ja Ruoŧas. Raporta galgá addit eambbo gelbbolašvuođa bátnedearvvašvuođa, bátnedivššu ja olggosgoluid birra bátnedikšuma oktavuođas Norggas. Ruoŧa loguid leat váldán mielde vai sáhttet guorahallat bátnedearvvašvuođa Norggas.
Norgga ja Ruoŧa buohtastahttin
Norggas lea bátnedikšu guovtti oasis, almmolaš ja priváhta bálvalus. Almmolaš bátnedivššohaga lea stáda ruhtadan ja fállá nuvttá dahje measta nuvttá bálvalusa vuoruhuvvon joavkkuide. Rávisolbmot galget vuosttažettiin geavahit priváhta bálvalusa ja ieža máksit divššu ovddas. Dušše olbmot geain leat erenoamáš dávddat ja buozalmasvuođat sáhttet oažžut máksojuvvon ruđa ruovttoluotta divššu ovddas.
Ruoŧas lea dikšu organiserejuvvon measta seamma vuogi mielde go Norggas. Ruhtadeapmi lea aŋkke earálágan. Ruoŧas leat golbma doarjjavuogit almmolaš ortnegiin mat leat rávisolbmuid várás. Juohkehaš oažžu jahkásaš supmi iskkadeapmái ja dikšui, nu gohčoduvvon almmolaš bátnedikšundoarjaga.
Heajos ruhtadilli váikkuha
Olbmuin, geain lea heajos dienas ja ruhtadilli, eai fina nu dávjá bátnedivššus, vaikko livččii dárbu dikšut bániid. Aŋkke čájehuvvo Norggas ja Ruoŧas ahte lohku lea njiedjan maŋemus logi jagi sin gaskkas geat eai mana bátnedivššus ekonomiija dihte.
Nissonolbmot mannet dávjjit bátnedivššus go dievdoolbmot, muhto čájehuvvo maid ahte nissonolbmuin lea heajut bátnedearvvašvuohta go dievdduin sihke Norggas ja Ruoŧas.
Mađi buoret dienas ja oahppogelbbolašvuohta olbmuin lea, dađi buoret bátnedearvvašvuohta, dieđiha SSB raporttas. Dearvvašvuođa- ja fuolahusdepartemeantta lea ruhtadan raportta barggu.
