Norggas eai leat máŋganuppelot jahkái duššan nu olu olbmot mohtorsihkkellihkohisvuođain giđđat ja árrageasi go dál.
Dán giđa ja árrageasi leat 12 mohtorsihkkelvuoddji duššan johtolagas. Nu alla lohku ii leat leamaš 2009 rájes.
– Mis lea obbalaččat leamaš hui heajos álgu johtolagas dán jagi. Maiddái mohtorsihkkellihkohisvuođain leat eanet olbmot duššan dán jagi. Mohtorsihkkeliin sáhttá hirbmat buorre vuodjit ja lea dávjá čahkedis vuoján. Buohkaide lea goitge hui dehálaš ahte leat čuođi proseantta áicil go vudjet, dadjá Trygg Trafikk seniorráđđeadi Bård Morten Johansen.
Eanas ribahan doaresbeallái
Duođaleamos lihkohisvuođaid dutket, ja raporttat čájehit ahte jápminlihkohisvuođain leat dávjjimusat ribahan vuodjit doaresbeallái.
– Jus luoddamohkis árvvoštallá leahtu boastut iežas vuodjinmáhtu ektui, de dávjá geavvá doaresbeallái. Ii dárbbaš rievtti mielde nu garra leahtuin vuodjime, muhto sáhttá leat garrasit leahttu go hálddašat. De lea bahá stiivut, ii ge máhte rupmašiin lihkadit nu ahte máhttá doarvái bures stivret mohki mielde, čilge Johansen.
Rávis dievddut dávjjimusat
Vearrámus MC- lihkohisvuođain leat dávjá rávis dievddut, badjel 45-jahakásaččat. Gaskkamuttos 2000-logu bođii ođđa vuodjinoahpahus Norggas, mii lei heivehuvvon dan máhtu mielde maid ledje háhkan lihkohisvuođaid birra.
Ollu vuoddjit eai leat ožžon dan oahpu go leat ovdal dien jagi vuodján goartta. Trygg Trafikk ávžžuha ođastit MC-oahpu dahje háhkat hárjáneami ja rávvagiid profešunealla fálaladagaid bokte.
