Politiijain lea leamašan gaskaboddosaš vearjudeapmi diimmá geassemánu rájes. Njukčamánu 13. beaivvi rájes eai leat politiijabálvvat šat vearjuduvvon.
Politiija sihkarvuođabálvalus (PST) árvvoštallá ahte terroráittadássi Norggas lea «muttát».
Politiijadirektevra Benedicte Bjørnland muitala ahte PST árvvoštallamiid vuođul lea politiijain ipmárdus ahte ii leat alla áittadássi.
Dán vuođul heaittihuvvo vearjudeapmi njukčamánu 13. beaivvi, diibmu 08:00.
– Áittadássi lea eahpevissis, ja árvvoštallo jotkkolaččat. Dilálašvuohta sáhttá jođánit rievdat, ja politiijat barget nu ahte mii sáhttit bargovugiid jođánit heivehit áittadási mielde, dadjá Bjørnland.
