SeastinBáŋku 1 Davvi-Norga heaittiha unnimus báŋkkuid. Dat mearkkaša ahte earret eará Guovdageaidnu báhcá báŋku haga.
SeastinBáŋku 1 Davvi-Norga heaittiha unnimus báŋkkuid. Dat mearkkaša ahte earret eará Guovdageaidnu báhcá báŋku haga.
Digitaliserema geažil ja go kundarat eará ládje geavahit báŋkkuid go ovdal, de lea finánsaealáhus nuppástuvvomin. Okta váikkuhus dás lea ahte šaddet unnit báŋkokantuvrrat. SeastinBáŋku 1 Davvi-Norga lea maŋimus jagiid ásahan nana gealbobirrasiid feara gos Davvi-Norggas. Báŋku lea ásahan 16 finánsaguovddáža, čállá báŋku preassadieđáhusastis.
– Mis lea jáhkku dasa ahte galgat gávdnot báikkiin, ja ahte mearrádusat dahkkojit lahka. Min 16 finánsaguovddáža fállet olles konsearna buktagiid, ja leat ožžon viidát válddi. Seammás oaidnit ahte ii leat vuođđu bisuhit mis daid unnimus filiálaid, dadjá SeastinBáŋku 1 Davvi-Norga konsearnahoavda Jan-Frode Janson.
21 filiála heaittihuvvojit
Dál galget heaittihuvvot 21 smávva filiálaža. Eanaš dáin leat doaimmahuvvon ovttain jahkedoaimmain, dahje unnibuin, ja máŋgasis leat maŋimuš jagiid leamaš gáržžes rahpanáiggit. Ii oktage bargi dattege masse barggus dáid heaittihemiid geažil.
Janson deattuha ahte SeastinBáŋku 1 Davvi-Norga ođasmahttimis lea sáhka das ahte ain bissut nana ja iešheanalaš riikaoassebáŋkun.
– Davvi-Norga lea min ruovttuguovlu. Mii galgat vuoitit gilvvu davvinorgalaš báŋkokundariid alde. Mis lea jáhkku dasa ahte galgat leat dies go kundarat dárbbašit buriid ekonomalaš rávvagiid. Danne áigut ain leat fysalaččat báikkiin miehta Davvi-Norgga. Vel rievdadusaid maŋŋil ge leat mis ain sullii seamma olu kantuvrrat go buot eará báŋkkuin Davvi-Norggas oktiibuot, dadjá Janson.
Báŋkus báhcet ain 38 kantuvrra 35 gielddas, gos 82 proseantta davvinorgalaččain ásset.
Áigot gávdnat buriid čovdosiid
Olbmot hárvvit ahte hárvvit galledit fysalaš báŋkokantuvrraid. 2015 juovlamánus dahkkojedje birrasiid 6 000 manuealla transakšuvnna SeastinBáŋku1 Davvi-Norggas. Seammás leat dán báŋkkus measta beannot miljovnna sisaloggema mobiilabáŋkui mannosaččat. Danne báŋku dál garrasit áŋgiruššá ovdánahttit digitála bálvalusaid, nu mo ovdamearkka dihte mobiila burssa mCASH.
– Mii ođasmahttit báŋkku vai sáhttit addit vel buoret fálaldaga min kundariidda. Seammás diehtit ahte ain leat soapmásat geat iešguđet sivaid geažil háliidit fitnat báŋkkus čađahan dihte báŋko- ja máksinbálvalusaid. Dáin áigut ain vára váldit. Mii dovdat iežamet kundariid, ja áigut singuin ovttasráđiid gávdnat buriid čovdosiid, dadjá Janson.
Konsearna ii leat vuos mearridan goas guhtege báŋkku giddejuvvo.
Dát báŋkkut heaittihuvvojit:
Salten regiovdna:
Hamarøy
Hålogalándda regiovdna:
Bø
Melbu
Lødingen
Evenskjer
Hamnvik
Borkenes
Tromssa regiovdna:
Olderdalen
Burfjord
Oteren
Hansnes
Tromsdalen
Gryllefjord
Stonglandseidet
Senjahopen
Sørreisa
Sjøvegan
Brøstadbotn
Bardu
Finnmárkku regiovdna:
Havøysund
Kautokeino
