Ođđajagemánu rájes ii leat šat vejolaš maŋidit Loatnakássa rehkegiid koronadoaimmaid geažil.
Buohkat geat mákset oappoloana Loatnakássii sáhttet maŋidit rehkega 36 geardde, mii vástida oktiibuot golbma jagi. Njukčamánu 2020 ásahii Loatnakássa máŋga koronadoaibmabiju ja okta dain lei ahte beasai maŋidit loatnarehkega nu ahte ii váldo dan váldoearis.
Ođđajagi 1. beaivvi rájes loahpahuvvo dát doaibmabidju. Jus kundariin, eará sivaid geažil, lea dárbu maŋidit rehkega, de fertejit geavahit váldoearis.
Oktiibuot leat pandemijaáiggis maŋiduvvon oahppoloana rehkegat njealji miljovnna ruvnno ovddas.
– Dát doaibmabidju ásahuvvui go vurddiimet alla bargguhisvuođa pandemiijaáiggis. Sivvan manne maiddái 2022:s leat ollu rehkegat maŋiduvvon sáhttá leahkit go reanttut leat lassánan ja ollu eará lea maid divron, dadjá Loatnakássa gulahallandirektevra Anette Bjerke.
Vuosttaš rehkegat bohtet fargga
19 000 kundara leat ollásii maŋidan loatnarehkegiid pandemijaáiggis. Dat mearkkaša ahte eai leat máksán oahppoloana njukčamánu 2020 rájes.
Romssas ja Finnmárkkus leat oktiibuot 33 102 olbmo geain lea oahppoloatna mii galgá máksojuvvot ruovttoluotta. Loatnakássa logut čájehit ahte pandemiijaáiggis leat Romssa ja Finnmárkkus maŋidan loatnarehkega 58 979 geardde, mii lea 1,78 geardde juohke olbmo nammi.
– Mii leat dal sáddeme vuosttaš rehkegiid mat galget máksojuvvot ođđajagemánus. Dat mearkkaša ahte oallugat ožžot liigegolu fargga mii sis ii leat leamaš badjel guovtti jahkai. Muhto lea dehálaš deattuhit ahte mis leat ortnegat mat sáhttet veahkkin leahkit jus leat váttis ekonomalaš dilis, dadjá Bjerke preassadieđáhusas.
