-Almmuhus-
OĐĐASATHeaittihit buot politiijavirggiid Eanodagas

Heaittihit buot politiijavirggiid Eanodagas

-

-

Ođđajagi rájes eai galgga Eanodaga gielddas šat leat politiijat, muitalii Lappi politiijahoavda Esa Heikkinen gieldda áirasiidda.

Lea Enontekiön Sanomat mii čállá dán ášši birra. Eanodaga gieldda mielas lea garralágan diehtu man politiijahoavda buktá, muhto eai vuollán áššis mas lea sáhka guovtti politiijavirggis.

– Mii eat guođe ášši dása, muhto áigut bargat buot maid sáhttit vai politiijavirggit bisoše Eanodagas. Mun sávan ahte sisministeriija ja politiijahálddahus váldet dán dieđu duođas, dadjá stivrra ságadoalli Seppo Alatörmänen Enontekiön Sanomat aviisii ja deattuha gieldda viidodaga.

– Eanodaga gielda Ylikyrös Gilbbesjávrái lea sullii 240 kilomehtera. Gihttelis girkogillái Heahttái lea 140 kilomehtera ja Gilbbesjávrái 310 kilomehtera, deattuha ságadoalli.

 

Gurret politiijavirggiid

Sámekultuvra ja -giella leat gieldda mielas guđđojuvvon olggobeallái bolesiid doaimmas.

– Gal dát geahnohuhttá vuođđolága máinnašuvvon vuoigatvuođa dorvvolašvuhtii. Dás lea gažaldat eanodatlaččaid ovttadássásašvuođas ja dásseárvvus. Dál dat orru čájeheame dan, ahte sámiid ruovttuguovlluid áigot gurret politiijavirggiin, jurddašallá gielddahoavda Jari Rantapelkonen.

 

Ovddida ášši ráđđádallangottis

Riikkabeaiveáirras ja politiijaáššiid ráđđádallangotti várreságadoalli Mikko Kärnä mielas dát orru heajos ášši, danne go gažaldagas lea Lappi politiijalágádusa operatiivvalaš mearrádus, masa bolesnjunnošat eai hálit seahkánit.

– Mu mielas lea gierdameahttun jos politiijabálvalusat váldojuvvojit eret Eanodagas. Olbmuid vuođđolágalaš dorvvolašvuohta lea dál áitojuvvon. Mun buvttán ášši ovdan, muhto gal gielda galgá ieš maid leat aktiiva dán ášši olis, deattuha Kärnä Enontekiön Sanomat aviissas.

-Almmuhus-