NRK Sápmi lea válljen heaittihit buot sáddagiid maid leat beaivit sádden, ja baicca ođasmahttit dan fálaldaga. Rievdadus lea juo golggotmánu 10. beaivvi, ja dalle jávket ge boares sáddagat.
NRK Sápmi lea válljen heaittihit buot sáddagiid maid leat beaivit sádden, ja baicca ođasmahttit dan fálaldaga. Rievdadus lea juo golggotmánu 10. beaivvi, ja dalle jávket ge boares sáddagat.
NRK Sápmi rievdada rádioprográmma ja álggaha oktasaš sáddaga mii gullo juohke beaivvi, diibmu guovttis gitta beal guđa rádjái.
Dát mielddisbuktá ge ahte buot sáddagat mat leat gullon rádios heaittihuvvojit, ja šaddá okta oktasašsátta gos gullojit buot fáttát.
Veaigesátta
Sii álggahit oktasaš sáddaga, mii gullo mánnodagas bearjadahkii diibmu guovttis gitta beal guđa rádjái juohke beaivve.
Dál jávket buot bivnnuhis sáddagat, nu go Ávvudanboddu, Disdat magasiidna, Árdna kulturmagasiidna ja Rádiosiida.
NRK Sápmi lea válljen oktasaš rádioprográmma ráhkadit, gos gullojit sullii seamma sáddagat go ovdal leat leamašan. Muhto Ávvudanboddu jávká oalát.
Váikko makkár fáttát
Prošeakta redaktevra, Ole Rune Hætta, muitala ođđa sáddagis bohtet gullot kulturáššit, ođđasat, dieđut, debáhtat ja nu ain.
– Muhto boahtá hui ollu das makkár sáttabeaivi šaddá, mii daid beivviid dáhpáhuvvá. Jus muhtin beivviid leat dáhpáhusat maid berre čuovvut, de fertejit dat áššit gullot sáddagis, čilge son.
Ávvudanboddu
Ole Rune Hætta muitala ahte go sii leat válljen heaittihit daid prográmmaid, de jávká ge maid bivnnuhis sátta, Ávvudanboddu .
– Diehttelasat bohtet muhtimat váillahit dán sáddaga, ja dan mii gal ipmirdit maid, lohká son.
Hætta lohká árvideames muhtimat moitet dáid rievdadusaid.
– Dál go eai dieđe vel ja eai ge leat gullan rievdadusaid birra, muhto go gullet, de gal jáhkán muhtimat bohtet moaitit. Ja go Árdna kulturmagasiinna leat váldán eret, de gal lea min maid veaháš bávččagahttán.
Eai jávkka, muhto gilvojuvvojit
Sii leat mearridan ahte kulturáššit eai gálgga čohkkejuvvot ovtta prográmmii nu mo ovdal leamašan, oktii vahkus, muhto baicca gilvojuvvot muđui dán fálaldahkii.
– Ii leat nu ahte kulturáššit jávket rádios, muhto dat galgá vuhttot ja oidnot olles dán fálaldagas.
Eambbo nuoraide
Sidjiide lea hui dehálaš muitalit ahte sii leat ođasmahttime sin rádiofálaldaga.
Ja NRK Sápmi rádiofálaldat ii leat rievdaduvvon 1990-logu rájes, ulbmil dál lea maid nuorat olbmuid oažžut eambbo rádio guldalit, ja nuorat leage de váldoulbmil, geaid áigot joksat buorebut.
Váikko prográmmat ja sáddagat rievdaduvvojit, de eai rievdda sámegielmusihkat dán vuoru gal, bohtet gullot liikká ollu sámegielmusihkat go ovdal leat leamašan.
Ođđasat ja “Veaigesátta”
Ođas- ja áigeguovdil redaktevra, Jan Rune Måsø duođašta ahte leat rádios rievdadusat mánnodat rájes.
Son muitala ahte iđitrádios gullojit ođđasat ja áigeguovdilvuohta sáddagiin, beaiverádios ges čiekŋudit eanet duogáš dieđuiguin ja maiddái guoimmuhemiin.
Sii háliidit olahit veaháš guhkkelebbui, nationála dássái sin ođđasiiguin ja doaivva lea ahte sii olahit dainna sáddagiin vel nannoseappot go ovdal.
– Galgá leat álki, go ovdamearkkadihtii iđđes, beaivet dahje eahkes bonjasta rádio ala, de galgá ipmirdit ahte dál don leat NRK Sámi guldaleamen. Dat galgá leat álki guldaleaddjái, ja mun jáhkán dat šaddá čielgaseappot ovddasguvlui, lohká Måsø
Dobbelii buvttadit eambbo
“Veaigesáddagis” gullojit sámi ođđasat, debáhtat ja čiekŋudeapmi.
NRK Sápmi smiehttá dál ahte sis lea ovtta láhkái ođasjohtu mii lea dego okta ja seamma, sihke neahttarádios ja TV sáddagis.
Sii bohtet dál botnjat veaháš eanet dán ođđasa, ja maiddái ráhkadit ođđasit ja áigeguovdileappot sáddagiid, mat galget olahit veaháš eambbo olbmuid dobbelis.
– Mii buvttadat eambbo áššiid mat ollet našunála dássái, go mis leat nu ollu buorit ja somás áššit. Lea ollu mii ánssáša oažžut našunála beroštumi, loahpaha Måsø.
