Norgga ja Ruoŧa boazoguohtunkonvenšuvdna heittii doaibmamis 2005:s. Dál heaittiha Norgga eanandoalloministtar ođđa konvenšuvnna šiehtadallamiid.
Norgga ja Ruoŧa boazoguohtunkonvenšuvdna heittii doaibmamis 2005:s. Dál heaittiha Norgga eanandoalloministtar ođđa konvenšuvnna šiehtadallamiid.
Lagabui 20 jagi leat geahččalan oččodit áigái ođđa Norgga ja Ruoŧa boazoguohtunsoahpamuša, muhto ášši ii leat čoavdašuvvan.
Mannan geasi leat Ruoŧa bealde dieđihan ahte eai sáhte ratifiseret ođđa soahpamuša, mii lea leamaš gárvvis 2009 rájes ja maid Norga lea dohkkehan ja čuvvon.
Dan dilis go lea váilon soahpamuš Norgga ja Ruoŧa gaskka, de lea Norgga beale boazodolliid dilli gártan hástaleaddjin, čállá Eanandoallodepartemeanta preassadieđáhusas man leat odne almmuhan.
– Norggas ain hálddašat iežamet geatnegasvuođaid ovddeš konvenšuvnna mielde, deattuha eanandoallo- ja biebmoministtar Jon Georg Dale.
Dat dagaha ahte Norgga beale boazodoallit unnán besset ávkkástallat Ruoŧa beale dálveguohtuneatnamiid.
– Dohkketmeahttun Norgga boazodolliide
Departemeanttas čállet ahte jagiid mielde leat lassánan Ruoŧa beale bohccot mat guhtot Norgga bealde, ja lea dagahan ahte Norgga beale boazodoalu doaibmaeavttut leat gártan hástaleaddjin.
Ealáhusa buvttadeapmi ja bohccuid dilli lea danne áitojuvvon, oaivvilda departemeanta.
Norgga bealde leat leamaš viiddis boazolohkoheiveheamit, oččodan dihte boazologu mii lea ekologalaččat ceavzil ja mii heive guohtuneatnamiidda.
– Lea dohkketmeahttun Norgga boazodolliide ahte Ruoŧa beale badjeolbmot johtet seamma guovlluide go ii gávdno bearráigeahčču das man olu bohccot guhtot doppe, seammás go ieža dáppe šaddet geahpedit, dadjá ministtar.
Áigu geahpedit Ruoŧa beale bohccuid
– Mun jurddašan ásahit láhkavuođu mainna beassat heivehit man olu Ruoŧa beale bohccot galget beassat guohtut Norggas, go váilu doaibmi boazoguohtunkonvenšuvdna ja vuhtii váldin dihte ekologalaš ceavzilis boazodoalu, lohká Dale.
Son lohká ahte ekologalaš ceavzilvuohta galgá leat vuođđun dákkár reguleremii, seamma ládje go Norggas muđuid ge heivehit boazologu.
– Ruoŧa boazodoallu Norggas šaddá de seamma eavttuid vuođul hálddašuvvot alimus boazologu dáfus Norgga guohtuneatnamiin, dadjá Jon Georg Dale.
Norga ii joatkke šiehtadallamiid
Ruoŧa bealde leat háliidan ahte soahpamušat galget jotkojuvvot, geahččalan dihte gávdnat čovdosiid áššis.
– Norgga bealis lea leamaš, ja lea ain, hállu oažžut áigái ođđa soahpamuša Ruoŧa ja Norgga gaskka. Mii leat guhká leamaš gergosat dohkkehit ođđa soahpamuša, lohká ministtar.
– Muhto daid bohtosiid vuođul mat leat gártan, ja daid hui hástaleaddji proseassaid vuođul mat leat leamaš, de mus lea unnán jáhkku dasa ahte ođđa šiehtadallamat buvttášedje čielggademiid maid boađusin šattašii ođđa soahpamuš. Lea jo šiehtadallon soahpamuš man vuođul galggašii sáhttit ratifiseret ođđa konvenšuvnna, lohká Dale.
– Danne ii leat min bealis gal šat sáhka joatkit šiehtadallamiid. Norgga bealis leat gergosat loahpahit dán, ja konstateret ahte proseassat eai leat buktán čovdosiid. Dan lean dieđihan Ruoŧa gilleministarii Svein-Erik Buchtii, muitala Dale.
Norgga ja Ruoŧa maŋimuš boazoguohtunsoahpamuš heittii doaibmamis 2005:s, maŋŋil go Ruoŧa beale eiseválddit hilgo Norgga árvalusa ahte guhkidit soahpamuša golmmain jagiin.
2009 guovvamánus lei árvalus ođđa soahpamuššii gárvvis, ovddasvástideaddji ministarat vuolláičálle dan golggotmánus seamma jagi.
Dan rájes leat oččodan soahpamuša ratifiserejuvvot ja doibmii biddjot, vai fas livččii dán guovtti riikkas soahpamuš.
