Politiijat leat heaittihan ášši mas ledje áššáiduhttán dievddu leat sivalažžan go nisu gávdnui jápmán ruovttustis Deanus.
Juovlamánu 29. beaivvi mannan jagi gávdnui badjel 50-jahkásaš nisu jápmán iežas ruovttus Deanus. Politiijat válde dalle gitta dievddu gii dieđihii jápmima birra ja áššáiduhtte su roavva veahkaválddis mas jápmin lei váikkuhussan. Son luitojuvvui háldogiddagasas beaivvi maŋŋel.
– Áššis ovddiduvvo buhtadusgáibádus. Ášši lea leamaš lossat mu klientii, ja lea buktán stuora ekonomalaš váikkuhusaid sutnje, dadjá su advokáhtta Hans Arne Nysæter aviisii.
Obdukšuvdnaraporta bođii njukčamánus ja Stáhtaadvokáhtta heaittihii ášši loahpas cuoŋománu.
