-Almmuhus-
-Almmuhus-
OĐĐASATHeaitán vuordimis buriid ođđasiid stáhtas

Heaitán vuordimis buriid ođđasiid stáhtas

-

-

Ođđa nammaduvvon dálkkádat- ja birasministtar ii atte Fiettar orohaga ovdoolbmui doaivaga ahte Nussir áššis galgá sidjiide buoridit dili.

Norgga ráđđehus lea ikte rievdadan ministariid, ja Dálkkádat- ja birasdepartemeantta ministtarin doaibmagoahtá Vidar Helgesen (Olgeš).

 

Mearrida loahpas

Mannan vahkus attiige Birasdirektoráhtta lobi Nussir ASA fitnodahkii álggahit ja luoitit ruvkebázahusaid Riehppovutnii, Fálesnuoris, muhto lea Dálkkádat- ja birasdepartemeantta, ja ministtar guhte loahpa loahpas mearrida áššis.

 

Seamma politihkka

Fiettar orohaga ovdaolmmoš Mikkel Nils Sara ii loga dovdat namas ođđa ministara, iige son jáhke olus áššis rievdat ođđa ministariin.

– Mun lean heaitán vuordimis buriid ságaid dien guovllus, eai ge leat vuordámušat ahte dainna buorrána dilli. Dat ministtar lea seamma bellodagas go ovddit ministtar, ja dain dieđusge lea ain dat seamma politihkka, lohká son.

 

Measta olu vuordit

Sara ii jáhke nu ollu dadjamuša das makkár olmmoš lea ministtar, muhto lohká lea lohpi sávvat.

– Lea measta menddo ollu vuordit ahte ođđa ministtar dagaha ahte rievdá buori guvlui min ektui, lohká son.

 

Ii ollu dadjamuš
Bivdi jođiheaddji Torulf Olsenis ii leat nu ollu dadjat ođđa Dálkkádat- ja birasministara birra, go lea ovddit ministtar mii háhppehii dáhkat mearrádusa, dahje lei duogábealde direktoráhta mearrádusa.
– Go mearrádus lea juo direktoráhta bealis dáhkkon, de ođđa minsttar ferte čuovvut ráđđehusjulggaštusa, mas celko ahte ráđđehus miehtá luoitit bázahusaid merrii. 

Olsen lohká goitge ii leat nu ollu dadjamuš Dálkkádat- ja birasministaris, go sii dušše mearridit dán ahte galget go addit lobi luoittit ruvkebázahusaid merrii.
– Dat lea gieldda ja ođasmáhttindepartemeantta guhte lea dohkkehan regulerenplána, ja dain eavttuid vuođul ii olle nu guhkas ahte beassa luoittit merrii, lohká son.

 

Guoddalit
Bivdi  áigot ge sáddet guoddaleami Birasdirektoráhta mearrádusa ESA:ii, mii Europa vákšun orgána.
– Dat lea danne  go mearrádus áitta mearrasámiid birgejumi álbmotrievtti ja ON:a julggaštusa álgoálbmotvuoigatvuođaid vuođul, lohká Olsen.

 

Vurdet ođđa ministara bargat eará ládje
Luonddu ja Nuorra searvvi Finnmárkku jođiheaddji Ella Marie Hætta Isaksen lohká sis leat vuordámušat ahte ođđa ministtar bargá eará ládje go ovddit ministtar.
– Mii gal vuordit ahte ođđa ministtar Helgesen doalvu Norgga rievttes guvlui, go min mielas lea áibbas dohkketmeahttun ahte merrii luoitit ruvkebázahusaid. Mii bargat dan ala ahte ovtta beaivvi rievda láhka nu ahte ii leat obage lohppii luoittit ruvkebázahusaid merrii, lohká son.

 

Áigot vaikke fysalaččat hehttet mášiinnaid
Luondu ja Nuorra áigu dáhkát buot maid sáhttet bissehit ruvkeplánaid Nussiris.
– Mii joatkit ákkastallat garrasit, ja nu ollugo nagodit. Min maŋemus ágga lea siviila jeagohisvuohta, mii mearkkaša ahte lássat iežamet fysalaččat hehttet mašiinnaide, lohká Hætta Isaksen.

 

Dálkkádat- ja birasdepartemeantta ministara Vidar Helgesena ii lean odne vejolaš oažžut ságaide.

-Almmuhus-