Sámi Valáštallan Lihttu Norgga juhkosa jođiheaddji Berit Rannveig Nilssen ii joatkke jođiheaddjin.
Sámi Valáštallan Lihttu Norgga juhkosa jođiheaddji Berit Rannveig Nilssen ii joatkke jođiheaddjin.
– Mun lean sádden dieđu stivrii ahte in áiggo joatkit SVL-N jođiheaddjin, duođašta Nilssen Ávvirii.
Háliida ođasmahttima
Dán vahkkoloahpa lea Sámi Valáštallan Lihttu Norgga juhkosis (SVL-N) jahkečoahkkin Álttás, gos maiddái leat jođiheaddjeválggat. Dálá jođiheaddji Berit Rannveig Nilssen muitala ahte son ii searvva válggaide.
– Mun lean jođihan jo vihtta jagi. Mu mielas obbalaččat eai galggašii jođiheaddjit menddo guhká čohkkát jus searvvit galget ovdánit ja ođasmáhttot, čilge Nilssen duogážin dasa go dál heaitá.
Válggat leat sotnabeaivvi, ja Nilssen ii loga diehtit leat go boahtán jođiheaddjiárvalusat.
– Árvideames eai boađe árvalusat ovdal jahkečoahkkimis, muitala son.
Miellagiddevaš áigodat
Nilssen muitala leamaš miellagiddevažžan doaibmat jođiheaddjin.
– Hui miellagiddevaš ja olu bargu. Mun sávan lihkku dasa gii dal de šattaš ođđa jođiheaddjin, ja sávan su joatkit bargat dainna buriin ovttasbargovuoiŋŋain mii mis dássážii lea leamaš, dadjá son.
Joatkkášii stivrras
Vaikke dál heaitá ge jođiheaddjin, de ii loga gal oalát guođđit SVL-N, jus olbmot evttohit su stivrii de soaitá joatkit doppe:
– Dat gal lea vejolaš.
