-Almmuhus-
-Almmuhus-
OĐĐASATHeahte­foanda guorra­nan ja ain ollu ohca­mušat meannu­dit

Heahte­foanda guorra­nan ja ain ollu ohca­mušat meannu­dit

-

-

Romssa ja Finnmárkku stáhtahálddašeaddji muitala ahte heahtefoanda lea guoros.

Boazodoalu heahtefoanddas lei birrasii 12 millijovnna ruvnno, muhto dál lea visot ruhta juolluduvvon. Romssa ja Finnmárkku stáhtahalddašeaddji boazodoalloossodaga direktevra Sunna Marie Pentha muitala ahte sis leat ain ollu ohcamušat meannudit ja sii leat ge dál rehkenastimin man ollu ruhta ain dárbbašuvvo.

– Mii leat dál juolludan visot ruđa, muhto ain leat ollu doarjjaohcamušat. Mii leat dál oččodeame čielgasii man ollu ruhta dárbbašuvvo vai sáhttit addit dieđu šiehtadalliide, dadjá Sunna Marie Pentha.

Šiehttadallanbealit leat eanandoallo- ja biebmodepartemeanta ja Norgga boazosápmelaččaid riikkasearvi (NBR) .

Dieđiheamen dárbbu

Heahtefoanddas lei badjelaš 12 millijovnna ruvnno, ja dat ruhta lea juhkkon gaskal Romssa, Finnmárkku ja Nordlándda boazosápmelaččaid.

– Mii leat dieđihan ahte lea dárbu eanet ruhtadeapmái. Eanaš guovlluin lea ain guohtunroassu. Duoddariin lea ain dievas dálvi, eat ge mii leat ožžon makkárge signálaid ahte guohtun galggašii leat buorránan, soaitá muhtun sajiin mearragáttis. Boazosápmelaččat bibmet dál ealuideaset olles leavttuin ja nu bohtet eanaš sajiin dahkat ain ovtta áiggi ovddas guvlui, lohká Pentha. 

Loga maid: – Guohtunroasu sivva lea jiekŋa iige beare ollu boazu

Oččodeame lassi ruđa

NBR doaibmi jođiheaddji Inge Even Danielsen muitala sii lea guhkit áigge bargan dan nammii ahte lasihit heahtefoandda.

– Mus lea jáhkku ahte lassi ruhta boahtá vaikko in leat gal vel ožžon duođaštuvvot maide, muhto mii leat dál gulahallamin. Dál ii leat vel čielggas man ollu ruđas lea sáhka, muhto mihttu ferte leat ahte galgá leat doarvái guohtunroassoáigodahkii, lohká Inge Even Danielsen.  

-Almmuhus-