Kárášjoga gieldda heahtegearggusvuođajoavku lea aiddobeliid, ovdalaš gaskaijaáiggi, lágidan preassakonferánsa Kárášjoga gielddavisttis. Preassakonferánssas čilgii gielddadoavttir George Nasr, joatkkaskuvlla rektor Synnøve Solbakken-Härkönen ja gielddadirektevra Kurt Maurstad manne leat válljen Kárášjoga joatkkaskuvlla giddet ja manne ohppiide ja oahpaheddjiide bidjet erren-áiggi.
Disdaga ledje skuvllas guossit geat bohte Davvi-Romssa joatkkaskuvllain ja okta dáid ohppiin buohccái ja sus balahit dál korona-dávdda. Maiddái dát boahtán oahppit leat dál biddjon erremii. Oahppis gean balahit leat korona-dávda lea dál iskojuvvon. Lávvardaga galget dát iskosat vástidit leago korona-dávda vai ii.
Oahppi man birra lea sáhka lea gullevaš Davvi-Romssa joatkkaskuvlii ja lea oassi mátkkoštanfárus mas leat oktiibuot 31 olbmo. Gielddadoavttir George Nasr lea mearridan sin galgat erremii. Dasa lassin leat birrasiid 150 oahppi ja oahpaheaddji Sámi joatkkaskuvllas errenáiggis.
Ožžon vuoiŋŋahatdávdamearkkaid
Oahppi lea ožžon vuoiŋŋahatdávdamearkkaid, dasa lassin go lea vearránan disdaga mielde ja lea maid ožžon febera.
Kárášjoga njoammudávddaeastadandoavttir George Nasr muitalii ahte Davvi-Romssa oahppit leat errenáiggis Kárášjogas gaskavahkkui, ovdal go fas vulget ruoktot.
– Dát oahppi mii dál lea buohcamen lea leamaš Frankriikkas ja Davvi-Italia ráji rájes, dasa lassin go lea johttán ruovdemáđija mielde mii finada Davvi-Italias, muitala doavttir Nasr.
Gidden skuvlla
Doavttir ovttasráđiid rektorin leaba mearridan giddet skuvlla ja sii leat maid mearridan dárkkuhit buot skuvlla ohppiid ja bargiid dego lagasoktavuohtan sutnje gii dál lea buohccán.
– Jus čájehuvvo ahte iskosat máid leat váldán oahppis leat positiivvat, de guhkiduvvo errenáigi 14 beaivái. Dieđusge lea nu ahte sii geat otne eai leat leamaš skuvllas, eai leat errenáiggis, muhto mii válljet mannat viidát go lea oanehis áigi ja danne lea olles skuvla ožžon errenáiggi, dadjá Nasr.
Ii váikkut bearrašiidda
Dat leat čielga eavttut dan ektui geat leat lagasoktavuođat ja geat eai leat, ja ohppiid ja bargiid bearrašat eai leat dan joavkkus.
– Bearrašat ellet áibbas dábálaš eallima. Mannet bargguide, skuvllaide ja mánáidgárddiide ja Folkehelseinstituttet ruovttusiiddus gávdnojit maid ollu dieđut juste dán birra. Muhto jus oktage bearrašis, dahje sii geat leat errenáiggis ožžot vuoiŋŋahatdávdamearkkaid de gal berre váldit oktavuođa dearvvasvuođa bargiiguin, dadjá Nasr ja čilge maid dan ahte vaikko muhtin nuoraidskuvlla oahppit leat leamaš joatkkaskuvllas beaivet, de eai rehkenastojuvvo sii lagasoktavuohtan sutnje gii lea buohcci ja sidjiide ja nuoraidskuvlii ii váikkut dát mo ge.
