Son almmuhii facebook sin orohagas leat boazosuollagat ja dáhttu olbmuid čuovvut mielde ja dieđihit jus oidnet maidege.
Son almmuhii facebook sin orohagas leat boazosuollagat ja dáhttu olbmuid čuovvut mielde ja dieđihit jus oidnet maidege.
Karen Eira Meløy, gii gullá Skáiddaduottar siidii, lea juohkán NRK Finnmárkku boazosuoládanášši rabas facebook-siidduin nugo «Oppslagstavla i Porsanger», ja čállá sin orohagas leat boazosuollagat ja dáhttu olbmuid čuovvut mielde ja dieđihit jus oidnet maidege.
Čalmmustahtte ášši
Karen Eira Meløy lohká Ávvirii ahte su lea bággu juoidá dáhkkát go su bearraša boazodoallu lea nu šaddan gillát maŋemus jagiid iešguđet ládje, ja rihkkosáššit eai oro ovdáneame áššáskuhttin eisseválddiid bealis.
– Mis leat maŋemuš jagiid báhččon bohccot ja mis leat mearkka rievdaduvvon áššit siiddas. Politiijat lohket gárvvisin dutkan áššiid ja aŋkke orru dego bisánan dasa. Áššit mannet njozet seammás go áššaskuhtton olbmot leat min birrasis. In sahte jaska orrut ja vuordit go dakkár vearredagut dáhpahuvvet min orohagas, lohká Eira.
Dat leige gaskavahkku go Boazopolitiijat ožžo dieđu ahte okta boazoeaiggát lei gávdnan bohcco goddon ja belohahkii njuvvon Beavkenjárgga báikkis Porsáŋggus. Boazopolitiijaid nubbinjođiheaddji Inger Anita Øvregård muitala sii leat áššáiduhtten ovtta olbmo gean váruhit vearredáhkki, ja leat burgán su ruovttus duoguštandihti duođaštusaid.
Boazopolitiijat eai lean vel ikte gažadan formálalaččat ovttage áššis.
Billisteapmi iige suoládeapmi
Øvergård lohká juridihkalaččat ii leat boazosuoládeami birra sáhka.
– Juridihkalaččat ii leat dat suoládeapmi, muhto billisteapmi go boazu lea dušše goddon iige leat váldon mielde. Jus livčče mielde váldán de livčče roavva suoládeapmi, ja mis leat ákkat jáhkkit njuovvamis lei ulbmil váldit mielde goruda.
Øvergård maid sihtá jus olbmuin dieđut, váldet oktavuođa boazopolitiijaiguin 02800 telefonnummara bokte.
