Dutkan čájeha ahte hávga borrá olu luossaveajehiid, muhto dutkit liikká eai ávžžut summal hávggaid bivdigoahtit gádjun dihte luossanáli.
Norgga Luonddudutkaninstituhtta (NINA) lea moadde jagi dutkan maid hávga borrá Deanučázádagas.
Dan leat sii čađahan dakko bokte ahte ostet dábálaš olbmuin hávggaid maid leat goddán Deanučázádagas, vai besset dárkkistit maid hávga borrá.
Bivdu sáhttá vahágin
Dutkanbohtosat čájehit ahte hávga borrá olu luossaveajehiid, ahte stuora oassi das maid hávga borrá leat juste fal luossaveajehat.
Liikká sii eai ávžžut bivddu bidjat johtui mas mihttu lea hávgga unnidit čázádagas, ja dainna lágiin viggat gádjut luossanáli.
Ágga dasa lea ahte NINA dutkit leat oaidnán ahte leat eanaš stuora hávggat main gávdnet luossaveajehiid čoavjjis. Dat sin mielas orru čájeheamen ahte smávit hávggat eai beasa sajiide gos stuora hávga lea, ja dakko bokte eai ge bora nu olu veajehiid go stuora hávga dahká.
Sii dadjet ahte jus dan stuora hávggaid logu unnida, de eai borro šat dat stuora hávgii, mii fas mielddisbuktá ahte eanet smávit hávggat borragoahtit veajehiid. Dati fas mielddisbuktá ahte šaddet eambbo borrit luossaveajehiidda.
Dán čállá NINA preassadieđáhusas.
