-Almmuhus-
KULTUVRAHástalit vuot gávttiin čiŋadit

Hástalit vuot gávttiin čiŋadit

-

-

Olbmot soitet aitto rádjan gáktečiŋaid maŋŋel beassášmárkaniid, muhto Nuoreh! ávžžuha daid fas rokkastit,  go bearjadaga lágiduvvo historjjá nubbi gáktebeaivi.

Bearjadaga cuoŋománu 10. beaivvi ávžžuhuvvojit sápmelaččat miehtá máilmmi coggat gávtti. Nuoreh! nuoraidorganisašuvdna lágida gáktebeaivvi nuppes.

 – Eat lean jáhkkit lihkostuvvat ná bures gáktebeivviin. Diibmá ledje 530 olbmo dieđihan Facebook bokte ahte áigot čiŋadit gávttiin gáktebeaivvi, ja dássážii dán jagi leat seamma oallugat vástidan searvat gáktebeaivái. Lea hirbmat suohtas ja doaivut oallugiid bidjat alddiineaset govaid Instagramii, lohká Nuoreh jođiheaddji Helge Ravna.

 

Dološ árgabeaigárvu

Nuoraidorganisašuvdna dáhtošii ahte sápmelaččat gárvodivčče gávttiin dávjjibut maiddái dábálaš árgabeivviid, ja danin lágiduvvo ge gáktebeaivi muhtin árgabeaivvi.

 – Dolin geavahedje gávtti beaivválaččat, muhto gákti lea massán dien saji. Mii háliidit ahte gákti geavahuvvo dávjjit ja danin hástalit olbmuid gáktebeivviin. Gáktebeaivi galgá maiddái čalmmustahttit sámevuođa ja sámit galget beassat čájehit iežaset identitehta stuora servodahkii, čilge Ravna. Son geažuha maiddái ahte gáktebeaivvi sáhttá čiŋadit eará sámi gárvvuiguin.

 – Diehttelasat ii leat buohkain gákti. Gáktebeaivvi sáhttá čiŋadit soljjuin, vuoddagiiguin, ulloliinniin dahje eará sámi čiŋaiguin, lohká son.

 


Nuoreh jođiheaddji Helge Ravna lei Oslo universitehtas diibmá go gáktebeaivi lágiduvvui. Priváhtagovva.

Oslo universitehtas gávttiin

Go olmmoš čiŋadan gávttiin, de oažžu olu beroštumi ja soapmásiidda soaitá dát veahá unohas. Dán ádde Nuoreh jođiheaddji Helge Ravna gii diibmá lei Oslo universitehtas gáktebeaivvi.

 – Šadden olu gažaldagaid vástidit, muhto in dovdan unohisvuođa. Olbmot muitaledje ahte lean fiinnis gávttiin, ja sin mielas ledjen “kula” go coggen gávtti. Lei erenomáš buorre dovdu gáktebeaivvi diibmá, muitala son.

 

Olles máilmmis

Nuoreh jođiheaddji muitá erenomáš bures ahte Guovdageainnu nuoraidskuvllas ledje oallugat coggan gávtti gáktebeaivvi diibmá.

 – Govva Guovdageainnu nuorain lei nu čáppis, sávan seamma oallugat čiŋadit maiddái dán jagi, lohká Ravna.

Son muittaša maiddái ahte sápmelaččat ledje čiŋadan gávttiin sihke Australias ja USA:s.

 – Lohpidan ahte dán jagi lea soames čiŋadeamen gávttiin maiddái Krakowas Polenis, loahpaha Helge Ravna.

-Almmuhus-