Koronavirus lea rievdadan ollugiid árgabeaivvi, ja leat máŋggas geat leat eanet ruovttus dál. Finnmárkku olggostallanráđđi álggaha bearjadaga ođđa doaimma ja ávžžuha olbmuid vuolgit olggos.
«Lekende Lett» lea ođđa doaibma man Finnmárkku olggostallanráđđi álggahii bearjadaga.
Doaibmabáŋku ráhkadan
«Brakkesyken» lea juoga maid ollugat sáhttet dovdat go orrot dušše viesus beaivvi miehtá.
– Lea hui buorre smávvábuidda ja stuorábuidda finadit olgun – vaikko dušše viesu olggobeallái. Dál bovdet olbmuid searvat min ođđa gilvui, lohká Hetlesæter.
Olggostallanráđđi lea ráhkadan ođđa doaibmabáŋkku mas leat olgodoaimmaide evttohusat.
– Leat doaimmat maid sáhttá bargat seamma beaivvi, ja muhtin eará doaimmat sáhttet ádjánit veahá guhkit áiggi. Min ráva lea ahte sii geat servet, válljejit ovtta doaimma juohke beaivvi, lohká Kristine Hetlesæter.
Čilgehus movt barggat
«Lekende Lett» doaimmas galggat mannat olggos stoahkat, ja de čálihit doaibmabáhpira, man gávnnat olggostallanráđi neahttasiiddus, ja darvehit dan seaidnái. Das merket juohke doaimma maid leat bargan vai oainnát maid leat bargan. Sáhtát maid čállit iežat doaimmaid maid fuomášat bargat.
Juogat áinnas iežat govaid Finnmárkku Olggostallanráđiin Facebookas dahje Instagrámmas.
Go leat čađahan unnimusat vihtta doaimma , de manat perletur.no siidui ja registreret iežat nama ja doaimmaid skovvii mii lea doppe. Deavdde dušše ovtta skovi iežat nammii. Sáddes dan maŋemusta cuoŋománu 24. beaivvi.
Finnmárkku Olggostallanráđđi čállá ahte sáhtát fasket vuoittu go searvvat dán doibmii.
Ávžžuhit leat várrogasat
Olggostallanráđđi deattuha maid ahte stohkosiid ferte čađahit dohkálaččat dearvvašvuođa ektui, ja čađat áigge čuovvut eiseválddiid ávžžuhusaid: Ale mana eará olbmuid lusa geat eai oro seamma viesus go don, muhto hástal áinnas eará bearrášiid, olbmáid ja ránnjáid sosiála mediaid bokte.
