Guolástuspolitihkas lea stuora mearkkašupmi ássamii ja ealáhusaide mearrasámi guovlluin. Danne bovde Bivdu searvi seminárii gos šaddá sáhka makkár oaidnu sámepolitihkkáriin lea guolástusáššiid birra.
Semináras, mii lágiduvvo Deanušalddis, lea guolástuspolitihkka váldofáddán.
– Mii háliidit čalmmustahttit daid bellodagaid, mat leat ceggen listtuid dán čavčča sámediggeválggaide, muitalit iežaset oainnu guolástusáššiide, čilge Bivdu organisašuvnna jođiheaddji Inge Arne Eriksen preassadieđáhusas.
– Guolástuspolitihkka lea mearrideaddji áššiin mat gusket ássamii ja ealáhusaide mearrasámi guovlluin Davvi-Norggas. Danne háliida Bivdu, mii lea mearraguolásteddjiid organisašuvdna, čalmmustahttit guolástusealáhusaid ja mearraealáhusaid sámediggeválggaid oktavuođas, čilge Inge Arne Eriksen.
Besset čalmmustahttit sin áigumušaid
Bivdu čilge ahte sii háliidit addit bellodagaide mat ceggejit listtu válggaide vejolašvuođa čalmmustahttit sin politihka ja muitalit maid sii áigot ovddidit Sámedikki boahtte njeallje jagi.
Lassin searvvi gažademiide, lea besset olbmot maid geat čuovvut seminára jearrat gažaldagaid poltihkkariin.
Seminára lágiduvvo web-semináran gaskasvahkku čakčamánu 1. beavvi diibmu 11-15.00, «Kunnskapens Hus» lanjain Deanušalddis. Seminára sáhttá ge maid čuovvut doppe, jus ii hálit neahta bokte čuovvut dan.
